Awng Padang mare masha ni hte seng nna amu gram sharai na matu shawk shawn da ai lam ya du hkra hpa n na lu shi

Mogok Seing In mare na masha sat manghkang hte seng nna rim hkrum ai Awng Padang mare masha marai 8 a amu hpe gram sharai ya na lam hte seng nna Nay Pyi Taw tara rung de August shata laman shawk shawn ai hta ya aten du hkra gaw hpa mahtai n lu shi ai lam chye lu ai.

“Mare masha marai 8 hpe Pyin Oo Lwi Ginwang Tara rung kawn tau hkrau maw mawn masha sat ai amu ngu tara je wat ai hpe n ra sharawng ai majaw gram sharai na matu Tara Rung Daju de grai myit mada nna tang shawn da ai re. Ndai mahtai hpe October 15 ya hpang de gaw mahtai jaw na re ngu kam ai, ndai laman hta gaw amu hte seng nna hpa n mai galaw shi ai. Ndai Pukma hpe sharai ya ai hpang she atsawm jep joi hkam sa wa na re” nga nna Duwa Lahtaw Zau Awng tsun dan ai.

Awng Padang mare masha marai 8 hpe nnan shawk shawn ai shaloi gaw ပုဒ္မ (၃၀၂) hte shawk shawn da ai re hte hpang daw de Pyin Oo Lwi Tara Rung kawn (၃၀၂) ၁(ခ) bai jat ai lam hpe gram sharai na matu Nay Pyi Taw tara rung de shawk shawn wa ai re. Ndai sawk shawn ai lam hte seng nna mahtai kaja lu na hpe kam lam, ndai manghkang hte seng nna mara kata rim sharen da hkrum ai Awng Padang mare masha ni hpe teng man ai mahtai pru hkra hparan sa wa lu na matu Wunpawng amyu sha ni yawng jawm akyu hpyi myit dum garum shingtau la na hpe dinghku nta masha ni myit mada nga ma ai re hpe mung chye lu ai.

Leave a Reply

Your email address will not be published. Required fields are marked *