Sumpra Bum Lahta Tsang Jawng kaw Jinghpaw Laika sharin ya nga ai sara ni shata shabrai nlu

Sumpra Bum mare na Lahta Tsang Jawng kaw lawu tsang jawngma ni hpe subject langai hku nna Jinghpaw laika hpe sharin ya nga ai jawng sara magam gun ni gaw jawng nnan hpaw ai aten kaw na shata shabrai nlu ai lam na chye lu ai.

“Ya aten Sumpra Bum ginwang kata na mare kahtawng ni hta Jinghpaw Laika sharin ya na matu Htunghking Hpung Ginjaw kaw nna sara marai 10 jan dat ya ai re. Jawng nnan hpaw ai June shata kaw na bungli nhprai hkra dingyang shang shakut taw nga ai re, raitim shata kumhpa hte seng nna garai nhkam la yu ai” nga nna Sumpra Bum Lahta Tsang Jawng na Sara SaqTawng Zau Nan tsun ai.

“Htunghking Hpung Ginjaw kaw nna dat dat ai hte maren Wunpawng amyu sha ni laika chye ra sai ngu ai yaw shada lam hte Sumpra Bum kaw nga ai ni gaw Jinghpaw Wunpawng amyu sha ni hkrai re. Raitim Jinghpaw Laika nchye ai majaw tinang a mying pi nchye ka ai hkrai re. Shata kumhpa nlu tim dingyang shakut shaja nga ai hpe seng ang ai Asuya ni hku nna gara hku mu mada ya nga ai kun gaw nchye ai, n gun n jaw mayu ai masa rai na re ngu mu mada ai lam matut tsun ai” nga nna mung Sara matut tsun ai.

Jinghpaw Laika hpe lai wa sai 2016 ning kaw nna sharin na ahkang jaw ai majaw tsang 1 kaw nna tsang 3 du hkra Subject langai hku sharin ya taw nga ai re. Dai ning 2019 ning kaw nna gaw Htunghking Ginjaw kaw nna sara shalat nna Sumpra Bum ginwang kata na mare kahtawng shagu na Jawng ni hkan dat ya ai re hte yawm dik jawngma marai 40 hta sara langai ngu Asuya kaw nna masat da ya ai re hpe chye lu ai.

Sumpra Bum ginwang kata hta jawng law ai raitim jawngma n law ai majaw tsang 2 hte tsang 3 hpe pawnghpawm nna jawngma marai 40 daram nga ai re hte tsang 1 kaw gaw jawngma marai 20 jan daram hpe sara marai 2 kawn dingyang sharin ya nga ai re hpe chye lu ai.

Photo; Sing Gawng Bum

Leave a Reply

Your email address will not be published. Required fields are marked *