Hpyenyen dabang ni hta N-gu malai Gumhpraw mahtang galai jaw na

HPA kawn hpyen koi yen dabang ni hta ya garum jaw nga ai N-gu a malai Gumhpraw mahtang galai jaw sa wa na lam September shata htum maga hta hpyen yen Mung shawa ni hte hkrumzup hpawng hta tsun bawngban ai lam chye lu ai.

Ndai zawn tsun bawngban ngut ai hpang Gumhpraw mahtang htuk ya ai hpe myit hkawn ai ni hte N-gu hpe sha madung htuk jaw ya na matu myit hkawn ai masha jahpan hpe dabang komiti kawn bai hta kahkyin nhtawm HPA de tang madun ai hta hkan nna galaw sa wa na re hpe chye lu ai.

“October shata kaw nna jahpan hta kahkyin ai lam galaw ai hta Gumhpraw yakhkak ai hpyen yen Mung shawa ni gaw Gumhpraw mahtang la na nga ni mung nga ma ai, nkau gaw dinghku masha jahpan hta na marai 2 (shr) marai 3 a matu gumhpraw la na nga nna jahpan bang ai ni mung nga ai” nga nna Woichyai hpyen yen dabang komiti tsun ai kaw na chye lu ai.

“N-gu htuk jaw dingyang rai nga yang pyi kalang lang nkau dum nta ni n gu n law sha ai ni nga ai hpe hparan jaw nga ai ten ya na zawn Gumhpraw htuk jaw na nga yang anhte a makau grup yin Hkauna galaw ai mung n nga ai shara re majaw myit tsang ai lam ni nga ai. Lawk zuphpawng ni hta mung, masa lam sanglang hpaji jaw ai lam ni galaw nga ai” nga nna Woichyai Dabang Ningtau Lithkam Hpt. Tangbau Hkun Awng tsun ai.

Ya na zawn N-gu a malai Gumhpraw sang jaw na matu yaw sing ai lam gaw atsawm sang sang lang lang n nga ai Garum hpung ni kaw na N-gu jaw ai mung shaning na sai re majaw Gumhpraw bai galai jaw ai hku nna chyam yu ga nga nna galaw hpang wa ai re nga nna mung Ningtau Dabang Up matut tsun ai.

Garum madu ni kaw nna lai wa sai August shata kaw nna dabang komiti hte jahkrup nhtawm hpyen yen Mung shawa ni hpe Gumhpraw mahtang jaw na bawng ai hpe Dabang Komiti ni kawn dabang shawa hte mahtang hkrumzup sanglang bawngban na matu hpyi shawn ai hpang zuphpawng hpang let jahpan hta kahkyin ai lam galaw nga ai re.

Lai wa sai shaning ni hta Mai Na hpyen yen dabang hta mung N-gu a malai Gumhpraw garum hkam la ai hpang Waingmaw kaw N-gu manu rawt mat nna N-gu n law sha ai manghkang byin ai majaw dabang shinggan le nna ja gumhpraw tam ai masha law mat wa ai lam  nga wa nna nkau Mung shawa ni gaw N-gu a malai gumhpraw mahtang jaw jang dabang bya wa mai ai masa nga ai nga nna mung tsun nga ma ai re.

Photo; Simsa Kasa (2016)

Leave a Reply

Your email address will not be published. Required fields are marked *