Myitkyina Shatapru kaw Karate sharin hpang

Myitkyina Muklum Shatapru Buga Hkalup Hpung Nawku Jawng Gawknu kaw Myu Sha Gintawng Karate hpung ni woi awn ai hte October 14 ya shani kaw nna Kyokushin Karate ginsup shaman hpang nga sai lam na chye lu ai.

“Nnan kaba wa ai Ramma ni hkam ja zet let ai hte ka-ni nam hpam n lu sha ai sha sak hkrung hkawm sa lu na matu, Wunpawng Mungdan hta mying gumhkawng nga ai Nsang Awng La zawn mying gumhkawng ai ramma law law paw pru wa lu na matu madung yaw shada nna sharin ai re. Asak pang masat da ai lam n nga, shingkit masat madang hpe yu nna sharin rai rai nna myit lawm ai ni yawng sa du sharin mai ai. Sharin ai lam hta ningtawn ai ni hpe shingjawng poi kaba hkan shang shingjawng shangun na rai nna Maigan Mungdan de du hkra manu jahpu n jaw ra ai sha hpung jat sharin hkam la na ahkaw ahkang mung lu na re” nga nna Sara Bashi Bawm Zung tsun dan ai.

Myu sha Gintawng Karate hpung ni ginsup ai lam hta grau tang du wa na matu hte kaga chye ging chye mai ai hpaji lam ni, du na ten Myu Sha Gintawng hpung na Ma ni Karate hpaji sha n-ga Mungkan hpaji hpe hka ja sa wa lu na matu shawng nnan hku nna sharin Sara marai (4), Philippine Mungdan Manila Muklum, San Juan City hta hpaji hkaja hkrun lam hpang nga sai lam mung matut chye lu ai.

Ndai sharin lamang hpe laban bat hpang langai ya, Masum ya, Manga ya shani hkan hkying 4:30Pm kaw nna hkying 6:00Pm du hkra sharin na re hpe chye lu ai.

Photo; Myu Sha Gintawng Jinghpaw Wunpawng Karate’s FB

Leave a Reply

Your email address will not be published. Required fields are marked *