Laiza Muklum kata na Hpaji Jawng ni pawnghpawm nna Laili Laika Hte Shingni shingjawng lamang galaw

Laiza muklum kata nga ai Hpaji Jawng ni pawnghpawm nna Laiza Lahta Tsang Jawng Rawt Ninghkawng Gawknu kaw October 22 ya hte 23 ya shani 2 ya tup Laili Laika hte Shingni Shingjawng Lamang galaw ai lam nga ai.

Ndai lamang hpe Ning Gawn Daju Pati Komiti kaw na woi awn galaw ai rai nna 59 lang na KIO Masat Nhtoi hpe hkap tau shagrau ai hku nna woi awn galaw ai re lam Ning Gawn Daju Laili Laika hte Shingni Komiti Ningtau Ningbaw Salang Yijawng Dai Hkawng tsun ai kaw na chye lu ai.

Hpaji sharin nga ai Jawngma ni Myutsaw Mung tsaw myit majing rawng wa na matu hte masha hpawng hta tsun shaga gwi ai Ningbaw ningla kaja ni byin tai wa na matu yaw shada let “Shanglawt Hpyenla” ngu ai ga shagawp hpe shakrai shingjawng ai lam, “Shanglawt Lu Ai Hpang” ngu ai ga baw hte ga tsun shingjawng ai lam, GOC Lahtaw Zau Seng a hkrang bung sumla ka (soi) shingjawng ai lam, Myu Tsaw Myit Majing ngu ai ga baw kata Lata Ka Tsawm shingjawng ai lam hte lawu tsang jawngma ni hpe Nsam Chya Shatsawm shingjawng lamang, Hkrang Pan ka (soi) shingjawng lamang, Lata Ka tsawm shingjawng lamang ni hpe woi awn galaw ai lam chye lu ai.

Shingjawng lamang hta Laiza Muklum kata nga ai Woichyai IDP lawu tsang jawng, Mung Lai Hkyet lawu tsang jawng, Laiza Lapran  Tsang Jawng, Laiza Lahta Tsang Jawng hte Sama Ginwang Nawng E Hku Sasana Lahta Tsang Jawng kaw na jawngma ni shanglawm shingjawng ai hta Masat 1, 2, 3 lu mat wa ai jawngma ni hpe October 25 ya shani Laiza Muklum kaw galaw na KIO Masat Nhtoi Hpawng lamang hta shagrau kumhpa jaw na re hpe mung matut chye lu ai.

Photo; WP Salum’Fb

Leave a Reply

Your email address will not be published. Required fields are marked *