Laiza Muklum kaw 59 ning hpring KIO Masat Ninghtoi hpawng lamang galaw

59 ning hpring Wunpawng Mungdan Shanglawt Hpung Masat Ninghtoi lamang hpe Laiza Muklum Padang Hkrunlam Majan Masing Woi Awn Rung Gawknu kaw October 25 ya jahpawt hkying 8:30Am aten hta galaw la lu sai lam chye lu ai.

59 ning hpring Wunpawng Mungdan Shanglawt Hpung Ginjaw  Komiti Tingnyang Up, Du Daju Jum Nban La a Numhtet shatsam mungga hpe Ninggawn Daju Pati Komiti Dinggrin Salang, Salang Chyana Zau Awn kaw nna hti shalai ya ai lam galaw ai.

“Wunpawng Mungdan Shanglawt Hpung ngang grin nga na matu gaw Pati ahkyak ai, dai majaw pati a lam n chye na shi ai Mung shawa n nga, magam gun kaji kaba ni mung Pati a lam, KIO a woi awn ai masa lam ni hpe kamhpa let hpung shang Salang law wa hkra, wunpawng amyu sha ni hte Mungdan masha yawng shada myit hkrum kahkyin gumdin ai hte Hpung Pati hta yawng shang lawm sa wa na matu,  KIO Hpung Pati  woi awn ai masa lam yan ni hpe hkaja la nna hpung shang masha majing byin tai hkra ya kaba wa ai ramma ni mung pati a lam hpe myit lawm hkum lawm hte yawng jawm hkaja nhtawm amyu sha yawng shada myit hkrum kahkyin gumdin ai hte amyu sha gawgap lam hta rau jawm shakut shaja sa wa ga” nga nna Wunpawng Mungdan Shanglawt Hpung, Ginjaw Komiti Tingnyang Up Malai II Sara Kaba Sumlut Gam kaw nna Ningbaw kaba a 59 ning hpring KIO Masat Ninghtoi Numhtet shatsam mungga hpe mahta nna n-gun jaw shatsam mungga jaw ya ai re.

Laiza muklum kaw galaw ai Ginjaw Komiti Tingnyang UP,  Du Daju Jum Nban La a (59) ning hpring KIO Masat Ninghtoi Shatsam Mungga hpe sa du madat hkamla ai Magam Dap, Makan Dap shagu na magam gun ni hte Mungchying Mung shawa ni marai 1574 nga ai re. Hpawng hta Ninggawn Daju Laili Laika Hte Shingni Komiti kaw nna October 23-24 ya laman Laiza Muklum kata hpaji jawng (5) kaw na jawngma ni hpe shingjawng lamang woi galaw ai hta masat 1, 2, 3 lu ai jawngma ni hpe shagrau sha-a ai lamang ni hpe mung galaw nna shagrau kumhpa hpe Ninggawn Daju Laili Laika Hte Shingni Komiti Ningbaw Du kaba Nhpang Naw Bu kaw nna shagrau jaw ya ai lam chye lu ai.

59 ning hpring KIO Masat Ninghtoi hpawng lamang hpe Ninggawn Daju Kata shara (6) kaw galaw ai rai nna Wunpawng Mungdan Ginwang Ginjaw shagu, hta mung galaw ai re hte KIO Masat N’htoi hpe madi shadaw ai hku nna Laiza Muklum Zup Awng Simsa Ginsup Pa kaw Ginsup hpan amyu myu hpe shingjawng ai lamang mung galaw la lu sai re hpe chye lu ai.

Leave a Reply

Your email address will not be published. Required fields are marked *