Jinghpaw Mung Hkring Mang Daju hte Hpung Salang ni KTCS Jawng de sa du gawan

KTCS Nawng Nang Chyum Dakkasu kaw Jinghpaw Mungdaw Hkringmang Daju Dr. Hkyet Awng hte Mungdaw Asuya Salang hpung ni October 26 ya shani hkying 9:00 aten daram hta sa du gawan ai lam na chye lu ai.

Jinghpaw Mungdaw Hkringmang Daju Dr. Hkyet Awng gaw Mungdaw Asuya lung wa ai aten kaw nna KTCS Nawng Nang Chyum Dakkasu de ndai lang shawng ningnan lang sa du ai mung re hpe chye lu ai. Mung shawa a Asuya nga ai hte maren Mung shawa ni hta ra kadawn nga ai lam ni hpe Jahpring shatsup ya na matu, KTCS Jawng grau nna rawt jat galu kaba wa na lam hta madi shadaw lu na matu Alu Ja Gumhpraw sa du garum ai hte Jawngma ni hte Jawng Sara, Saranum ni hte mung sa du hkrum tsup ai re lam chye lu ai.

Hkrumzup ai hta Jawngma ni hpe Jinghpaw Mungdaw Hkring Mang Daju kaw nna shatsam mungga hte Asuya kawn Mung shawa ni a matu galaw nga ai magam bungli lam ni hpe tsun sanglang dan ai re hte Mungdan rawt jat galu kaba wa na matu gaw Mung shawa n-gun hte madi shadaw ai lam ra ai majaw yawng jawm shakut sa wa ga nga nna tsun da ai re. KTCS Jawng hku nna Hkringmang Daju hte Asuya Salang ni hpe hkungga shagrau jaw ai lam, Hkringmang Daju Dr. Hkyet Awng mung KTCS jawng hpe alu Ja gumhpraw hku nna garum jaw da ai lam ni mung nga ai re hpe chye lu ai.

Leave a Reply

Your email address will not be published. Required fields are marked *