Mungchying Uphkang Dap (DGA) hpaw ninghtan ai (50) ning hpring Ja Jubilee hkap tau ginsup poi hpaw lamang galaw

Wunpawng Mungdan Shanglawt Asuya, Mungchying Uphkang Dap (DGA) hpaw ninghtan ai (50) hpring Ja Jubilee hkap tau ginsup poi hpaw hpawng lamang hpe October 27 ya shana daw hkying 2:00 aten Laiza Muklum Zup Awng Simsa Ginsup Pa kaw galaw ai lam chye lu ai.

Hpaw hpawng lamang hta “Wunpawng amyu sha ni hpe amyu kaba lailen hte dip up sai chyup da ai kaw nna lawt lu na matu Mung shawa rawt malan gasat sa wa ai hta Wunpawng Mungdan Shanglawt Asuya gaw lai wa sai 1962 ning hta Mungchying uphkang dap hpe hpaw hpang sai re. Uphkang Dap yu reng nga na matu1969 ning June, July shata laman hpawng ai Ginjaw Komiti hpawng hta DGA rung hpe hpaw shabawn dat sai rai nna daining 2019 shaning hta gaw 50 ning hpring sai hte magam bungli hta apnawng shakut shaja woi awn lai wa sai ningbaw ningla ni hpe shakawn shagrau masat masa galaw ai poi lamang hpe hkap tau ai ginsup lamang re” nga nna shabyin shatai komiti ningbaw Salang kaba Maji Naw Mai tsun ai kaw na chye lu ai.

Ginsup hpaw poi lamang hta ginsup hpung ni yawng kaw nna hpawng hta sa du ai shawa masha ni hpe hkawm gawai hkungga jaw ai lam Amyu hte Mungdan a matu asak apnawng mat sai share shagan ni hte Mungdan Dawnghkawn hpe hkungga jaw nhtawm ginsup ga sadi jawm marawn tsun nna ginsup hpaw lamang galaw la lu sai hte ndai ginsup lamang hta Gawdin, Ta Din, Ka Din, U Mun, Goft, Maraton hte kaga ginsup hpan yawng (18) ginsup sa wa na re hte November (10) ya shani du hkra ginsup shingjawng sa wa na re hpe chye lu ai.

DGA 50 ning hpring Gawdin ninggang kashun shingjawng sa wa na ginsup ninghkring ni gaw Laiza Muklum kata shanu nga ai lawk shagu na ramma ni hte Mung Seng Yang, Je Yang, Hpunlum Yang hpyen yen dabang ni kaw na ramma ni rai nhtawm October 27 ya shani hpaw poi ginsup shingjawng ai Uhpung ni gaw Woi Chyai hte Laiza lawk (4) ramma ni re hpe mung chye lu ai.

Leave a Reply

Your email address will not be published. Required fields are marked *