ABSDF Hpyen Dap hpaw ai (31) ning hpring masat nhtoi hpawng lamang galaw

ABSDF Hpyen Dap hpaw ai (31) ning hpring masat nhtoi hpawng lamang hpe November praw  (1) ya jahpawt hkying (10) aten hta Jang Htung, Lahkum Bum ABSDF gawknu kaw galaw la lu sai lam chye lu ai.

“ABSDF Hpyen Dap hpaw ai (31) ning hpring sai majaw lai wa sai aten ni hte nbung sai re. Mungkan mung lani hte lani galai shai wa ai zawn anhte Myen Mungdan mung galai shai ra sai, galu kaba ra sai re, htingbu Mungdan ni a Mung masa galai shai ai masa ni hpe yu nna anhte mung galai shai ra ai. Myen Mung Asuya gaw shi hkrai makoi magap nna magam bungli nmai galaw ai aten du nga sai. Ndai aten hta laknak lang rawt malan hpung ni hte anhte ABSDF jawngma ni, Mung shawa ni yawng myit hkrum ai hte Ta gindun nna hpyen gum shem wa hpe gasat sa wa ga” nga nna ABSDF dingdung daw ningbaw Ye Baw La seng (ရဲေဘာ္ လဆိုင္း) n gun jaw shatsam mungga tsun ai hpe chye lu ai.

Hpawng lamang hta tinang asak apnawng let Mung shawa akyu ara a matu majan pa shang, laknak lang gasat rawt malan gasat ai, tengman ai lam hpe galaw na matu ABSDF jawng hpaw hpang wa ai labau hpe Gyijum Nyo Nyo Linn  kaw nna du sa ai masha ni hte magam gun masha ni hpe tsun jahpra tsun dai ai re.

Hpyen majan kaw hkrat sum mat wa sai ABSDF magam gun ni marai kade rai sai hte hkala hkrum ai magam gun ni yawng marai kade re hpe du sa ai shawa masha ni hte ABSDF magam gun masha ni hpe tsun sanglang dan ai lam, ABSDF a Mung masa, hpyen masa labau ni hpe mung tsun jahpra dan ai lam ni galaw ai re hpe chye lu ai.

ABSDF Hpyen Dap hpaw ai 31 ning hpring masat nhtoi hpawng lamang hta lak san saw shaga da ai Salang ni hte magam gun ni, Laiza kaw na Mung shawa nkau ni hte ABSDF Dap ma ni marai 150 daram sa du shanglawm ai ai re hpe mung chye lu ai.

Leave a Reply

Your email address will not be published. Required fields are marked *