Laiza kaw CRC Day 30 ning hpring lamang galaw

Ginjaw hpaji Dap kaw na woi awn ai hte Ma ahkaw ahkang hte seng ai CRC Day 30 ning hpring lamang hpe November 20 ya shani Laiza Muklum Sinpraw Majoi Manau wang kaw galaw ai lam chye lu ai.

Lamang hta Ma ni a lu ging lu ang ai ahkaw ahkang hte seng nna Kanu Kawa ni, Mung shawa ni chye na hkan san a matu, chye na hkawn hkrang nna ta tut jai lang lit la sa wa na hte CRC ngu ai Ma ahkaw ahkang hte seng ai lamang ni hta shanglawm nna ningmu ni hpe garan gachyan, shanglawm na matu yaw shada let galaw ai re lam Ginjaw Hpaji Dap Ningtau Amu Madu Hpunpyen Zau Hkyen tsun ai kaw na chye lu ai.

Laiza kaw galaw ai CRC Day lamang hta KEC, MEC, NGO, Arrawaddy hkan na garum shanglawm ai re. Ma ni a kraw kata hta hkam sha nga ai lam ni hpe hkrang shapraw ka da ai hkrang pan madun lamang, jawng kata na jawngma ni a shamu shamawt ai sumla madun lamang, Ma ahkaw ahkang hte seng ai gamung naura madun lamang, ka hkrang lamang, ginsup lamang hte jawngma Kanu Kawa ni hte laksan hkrum zup bawngban ai lamang hte hpungdum hku nna Manau nau woi lamang ni mung galaw ai re hpe chye lu ai.

CRC Ma ahkaw ahkang Masat Nhtoi lamang hpe Laiza Muklum, Je Yang, Hpunlum Yang hte Mai Ja Yang Muklum ni kaw galaw ai rai nna du wa na shaning ni hta mung CRC Day hpe matut galaw sa wa na matu hkyen lajang da ai lam ni mung nga ai re hpe chye lu ai.

Leave a Reply

Your email address will not be published. Required fields are marked *