Jinghpaw Mungdaw Masat nhtoi lam hte seng nna n-gun madun

72 lang na Jinghpaw Mungdaw Masat Nhtoi hta Jinghpaw Mung ngu ai ga si hpe Jinghpaw laika hku n lang ai sha, Myen laika hku lang ra ai ngu nna Asuya tsun wa ai majaw nra sharawng ai shawa masha ni kawn January (7) ya shani Myitkyina Shatapru Manau wang kaw n-gun madun lamang galaw ai re.

Ndai lamang gaw labau hte seng ai rai nga ai, Jinghpaw Mungdaw nhtoi gaw mi moi kaw nna nga nga sai re majaw ndai hpe majoi shamat nmai ai, Jinghpaw Mungdaw nhtoi hpe shamat wa ai majaw ninghkap n-gun madun ai lam re nga nna Sara Zukdaw Tsawm Naw tsun ai hpe chye lu ai.

Lai wa sai December 23 ya shani Manau Htingnu kaw Jinghpaw Mungdaw Asuya kaw nna 72 ning hpring Jinghpaw Mungdaw masat nhtoi hpe Jinghpaw laika hku nka ai sha, Myen laika hku sha ka lang ra ai ngu tsun shana aming jahkrat ai lam nga ai hte ndai lamang hpe Asuya kaw nna woi awn galaw sa wa na re majaw shang chying lau ai lam ni, dinbai dingna jaw ai lam ni nga wa yang Upadi hte maren ahkyak la na lam seng ang ai Mungdaw Asuya kaw nna tsun sadi jaw wa ai lam nga ai hpe Sara matut tsun dan ai.

Htunghking lam hpe Asuya ni hku nna sa shang shalau nga ai lam, anhte a htungking manau wang re majaw  Jinghpaw laika n mai lang ai, Myen laika hku sha lang na ngu ai gaw n galaw ging ai, Mungdan mying langai ngai hpe shamat wa ai masing hpe n galaw ging ai, Mungdan a mying hpe galai na mung shanhte hta ahkaw ahkang n nga ai lam Sara Zukdaw Tsawm Naw matut tsun ai.

Shawa n-gun madun lamang hta Mung shawa marai 200 daram sa du shanglawm ai lam Myusha Pyen U shana wa kaw na chye lu ai.

Photo Credit; EPN

Leave a Reply

Your email address will not be published. Required fields are marked *