Nam Hpyek mare makau kaw Myen Hpyen Dap nnan jung hkyen ai majaw Mung mare masha ni rem lu rem sha yak hkak wa mai

Danai Lido lam, Nam Hpyek mare makau kanoi sun, nbungli pa mayan kaw lamu ga Eka 1000 daram hpe Myen Hpyen Dap, Hk.L.Y (74) Dap ni Hpyen Dap nnan shara jahkrat la wa ai re majaw Nam Hpyek mare hte Ting Kawk mare na Mung shawa ni galaw lu, galaw sha, hkawm sa hkawm wa ai hte dusat yam nga rem lu rem sha yak hkak wa mai ai lam buga masha ni tsun shana wa ai kaw na chye lu ai.

“Yuzana hte Nam Hpyek mare lapran kaw maning hkan gaw dai shara hta ginra jasan Myen hpyen hpung ni du wa jang jahkring jahkra shinglam la ya ai ni gan nga ai re. Ting Kawk mare hte Nam Hpyek mare na dusat yam nga ni gaw dai mayan de hkrai dat ai re majaw yak hkak ai lam ni nga wa mai ai. Myen hpyen Dap ni Dap shara jahkrat na matu gaw n hkrak ai” nga nna Ting Kawk mare na mying n shadawng ai Mung shawa langai tsun dan ai.

Ya aten Myen Hpyen Dap ni gaw Sumbwi Yang maga de mung Hpyen Dap nnan jung na matu lawu Myen Mung de na hpyen mawdaw ni hta laknak machyu pala hte malu masha htaw nna shani shagu ngu na daram lung nga ai re. January shata praw 5 ya shani mung hpyen mawdaw 36 tup lung wa ai lam ginra shi sawk ni kaw na chye lu ai.

 

Leave a Reply

Your email address will not be published. Required fields are marked *