72 lang na Jinghpaw Mungdaw Masat Nhtoi lamang galaw

Jinghpaw Mung kata na muklum nkau ni hta 72 lang na Jinghpaw Mungdaw Masat Nhtoi lamang hpe January 10 ya shani galaw ai re.

Hpakant Amyu Sha Zinlum Hpung kaw nna woi awn ai hte January 9 ya shana Yu-ngwi pinra lamang galaw ai rai nna January 10 ya shani hta gaw Nlung Shadaw Pa kaw Amyu Sha Dawnghkawn sharawt nna Wunpawng Amyu sha ni a dum nta shagu kaw Amyu Sha Dawnghkawn sharawt ai lam galaw ai re hpe chye lu ai.

72 lang na Jinghpaw Mungdaw Masat Nhtoi lamang hpe Maw Wan Nlung Shadaw Pa kaw akyu hpyi hpawng lamang galaw nhtawm kyu hpyi hpawng ngut ai hpang amyu bawsang shagu na htunghking ka hkrang lamang ni ka manawt ai re.

Matut nna Putao Amyu Sha Zinlum Hpung ni woi awn ai hte 72 Lang na Jinghpaw Mungdaw Masat Nhtoi shani hta Putao kata na Rawang, Lisu, Jinghpaw ramma ni pawng nna Futsel gawdin shingjawng poi lamang galaw ai lam nga ai rai nna Jaw Masat buga hpung masha ni hte Awng Lawt mare na hpyen yen Mung shawa ni hku nna “Jinghpaw Mungdaw Nhtoi hta anhte a lamu ga anhte a Mungdan hpe jaw ya ai Karai Kasang kaw chyeju shakawn akyu hpyi nna simsa ai hte lam hkawm ai lam ni galaw ai re hpe mung chye lu ai.

Manmaw muklum kaw mung Manmaw Wunpawng Shingni Hpung kaw nna woi awn ai hte Jinghpaw Mungdaw Masat Nhtoi lamang galaw ai hta Manau nau ai lam, Yu ngwi pinra lamang, Fashion show lamang hte ginsup lamang ni hpe galaw ai re.

Jinghpaw Mungdaw Masat Nhtoi lamang hpe Myitkyina, Namti Lambraw Yang kaw mung akyu hpyi hpawng galaw ai rai nna Kamaing mare kaw mung akyu hpyi hpawng galaw nna  ginsup poi lamang ni hpe mung galaw ai re hte Sagaing hte kaga shara law law hta galaw ai re hpe chye lu ai.

Photo; credit

Leave a Reply

Your email address will not be published. Required fields are marked *