Ja Htu Zup gat nnan gawgap la lu na matu buga masha ni, Asuya rung de hpyi shawn

Danai Lido lam, Ja Htu Zup Gat bai gaw gap la lu na matu buga masha ni kawn seng ang ai Hpakant ginwang Asuya rung ni de hpyi shawn da ai lam nga ai hpe buga masha ni shana wa ai kaw na chye lu ai.

Ja Htu Zup gat Komiti ni kaw nna mare masha ni hte bawngban jahkrup let gat nnan hpe gaw gap sa wa na matu seng ang ai Myen Asuya rung ni de gaw gap ahkang laika bang hpyi shawn da ai re. Rai tim hpa shiga shana wa ai lam n nga shi ai re hte gat wang gaw gap na matu hkyen shajin ai lam hte seng nna buga masha langai ya na zawn tsun dan ai.

Asuya hte garum ningtum uhpung uhpawng ni lauban launa ni kaw nna Gat wang galaw na matu sa du garum jaw ai lam nga ai raitim dum nta hkru sum mat ai Mung masha ni hpe gaw kadai ni mung tang du hkra sa du garum ai lam n nga ai majaw dum nta wan hkru sum mat ai htinggaw 10 jan a matu ya aten malu masha, hpun palawng, tsi mawan ni hte nga shara hkyak hkyak ra kadawn nga ai lam na chye lu ai.

Lai wa sai 2019 December 30 ya shana Ja Htu Zup gat wang wan hkru wa ai majaw gat seng 140 hte mung masha dum nta wang kaba 4 mung wan hkru sum mat ai rai nna ya aten dut lu dut sha ai lam hpe lam makau hte gat ding sa ni hkan sha dut ginlen nga ai re hpe mung chye lu ai.

Leave a Reply

Your email address will not be published. Required fields are marked *