Hpawmi langai bawm kabye kapaw hkala si

Manmaw Ginwang, N-mawk, Maru Kahtawng makau kaw kanu num langai hkam bawm kabye kapaw la ai majaw asak si sum mat ai lam buga masha langai shana wa ai kaw na chye lu ai.

Hkam bawm kabye kapaw la nna asak si sum mat ai kanu num gaw Manmaw Lisu hpyen yen dabang kaw na Myitung Hka a ning rum ningtau jan Ma (7) a kanu Jan Lasi Lu asak 48 ning re. Maru Kahtawng makau na nam maling de kana jan Lasi Hkawn, kaning jan Su San Na yan hte rau shat mai tam sa ai kaw bawm kabye kapaw la ai majaw asak si sum mat ai re lam na chye lu ai.

Jan Lasi Hkawn, Jan Lasi Lu, Jan Su San Na ni gaw Maru Kahtawng de tinang a yi, sun wa gawan let shat mai tam ai kaw marai 3 hte bawm kabyen kapaw la ai rai nna Jan Lasi Lu gaw ningma grai sawng ai majaw bawm kapaw ai shara kaw nan asak si sum mat ai re hte hkam bawm gaw kadai kara uhpung ni hkam da ai bawm re hpe n chye ai lam buga masha ni tsun dan ai.

Maru Kahtawng gaw Zinlum Bum grup yin na mare kahtawng langai rai nna Myen Hpyen Dap hte ni ai shara re majaw Myen Hpyen Dap ni shamu shamawt dap jung nga ai mare re.

Asuya hte NGO uhpung ni kaw nna hpyen yen ni hpe dawm wa na matu lajang ai lam ni nga wa ai re, tinang a sun wang ni hpe wa gawan ai hta n-dai zawn mabyin ni grai law wa ai majaw hpyen yen ni hku nna mung tinang a buga ginra de wa na matu shimlum lam n nga ai hpe myit tsang ai lam ni nga ai hpe mung buga masha langai tsun ai.

Asak si sum mat ai Jan Lasi Lu a moi mang hpe January 17 ya shani makoi mayang sai rai nna shi a kana hte kaning yan gaw Manmaw tsi rung de tsi tsi hkam la nga ai re. Rai tim kana Jan Lasi Hkawn gaw ningma loi sawng ai majaw tsang ra ai madang rai nga ai hpe mung chye lu ai.

Leave a Reply

Your email address will not be published. Required fields are marked *