Mazut roi rip nna sat kau hkrum ai laika sasana Saranum yan a (5) ning ladu hkrum myit dum akyu hpyi hpawng galaw

Myitkyina, Nawng Nang mare, Jaw Bum kaw January 19 ya shana de hkying 1:00Pm aten hta KBC Laika Sasana Saranum Tangbau Hkawn Nan Tsin Hte Saranum Maran Lu Ra yan Mazut roi rip sat kau hkrum ai (5) ning ladu hkrum myit dum akyu hpyi hpawng lamang galaw ai lam chye lu ai.

5 ning ladu hkrum myit dum akyu hpyi hpawng hpe KBC Ginjaw kaw nna woi awn galaw ai rai nna Sarnum yan mazut roi rip kau hkrum ai lam hpe myit dum let amu manghkang hte seng nna teng man ai mahtai hpe lu na matu akyu hpyi n-gun la ai hpawng lamang mung re lam hpawng lamang hte seng nna KBC Amu madu Rev. Hpauyawng Tu Mai tsun ai kaw na chye lu ai.

Kyu hpyi hpawng lamang hta Myitkyina ginwang, Htingnai ginwang, Waimaw ginwang na nawku hpung masha ni sa du shang lawm ai rai nna Mungmau ginwang hta mung kyu hpyi hpawng lamang kaba galaw ai hte KBC shangwang kata na ginwang shagu, buga hpung shagu ni kaw mung kyu hpyi hpawng lamang hpe galaw ai re lam chye lu ai.

Saranum yan a amu manghkang garai n ngut kre shi ai re majaw teng man ai mahtai pru na matu myit mada nga dingyang rai nga ai hte maren seng ang ai Komiti kaw nna mung amu hpe matut sawk sagawn nga dingyang naw rai nga re hpe chye lu ai.

Saranum yan gaw lai wa sai 2015 ning January 19 ya shana Sam Mung, Kawng Hka mare kaw KBC laika sasana apnawng nga ai ten shan lahkawng nga ai nta kaw nan Mazut roi rip sat kau hkrum ai rai nna 2020 ning January19 ya shani gaw 5 ning ladu hkrum sai re.

Leave a Reply

Your email address will not be published. Required fields are marked *