WHG ningbaw magam lit hpe Zaiwa Bawsang ni bai woi awn galaw sa wa na

Wunpawng Htunghking Hpung Ginjaw (WHG) a ningbaw magam lit hta apnawng dawjau na matu Jinghpaw Wunpawng amyu bawsang shagu langai hpang langai mu gun ladaw langai hpra woi awn daw jau nga ai hta dai ning na mu gun ladaw nnan hta Zaiwa Bawsang ni bai ningbaw magam lit hpe woi awn sa wa na re hpe chye lu ai.

Ningbaw magam lit hta woi awn sa wa na matu Zaiwa Bawsang hta na Sara kaba Lasham La Nu hpe January 18 ya shani Myitkyina Shatapru Nau Ra lawk WZG Rung kaw galaw ai Zaiwa Amyu sha Mungshawa Zuphpawng hta lata shagrin la lu sai re hpe Zaiwa Laili Laika hte Htunghking Hpung Ginjaw magam gun Sara Mahkaw Awng Wang tsun ai.

2020 shaning kaw nna 2023 shaning ladaw du hkra na Zaiwa Laili Laika hte Htunghking Hpung Ginjaw hta ningbaw magam bungli hpe mi na mu gun ladaw dingsa na Ningbaw Du wa Zinghtung Tang hpe bai kahtap shatsam ai re hpe mung Sara matut tsun ai kaw na chye lu ai.

Zaiwa Amyu Sha Ginwang hpe Myitkyina Ginwang, Waimaw Ginwang, Manmaw Ginwang, Loije Ginwang, Mai Ja Yang Ginwang, Nba Pa Ginwang, Namti Ginwang, Hpakant Ginwang, Kyeng Tung Ginwang hte Mungmyit Sinli Ginwang 10 masat da nna woi awn zinlum nga ai re hpe mung chye lu ai.

Leave a Reply

Your email address will not be published. Required fields are marked *