Jawng Bawngring Rawt Jat Masing Lam Masan ka shapraw lu na matu bawngban hpawng galaw

Wunpawng Mungdan Shanglawt Asuya uphkang ginra kata hpaw sharin nga ai hpaji jawng ni hta Jawng Bawngring Rawt Jat masing lam masan hpe ka shapraw jai lang lu na matu Laiza Lahta Tsang Jawng kaw January 21-22 ya shani bawngban jahkrup ningmu jawm kahkyin ai lam galaw ai hpe chye lu ai.

Jawng Bawngring Rawt Jat masing hpe Ginjaw Hpaji Dap kaw nna lai wa sai shaning kaw nna yaw sing nhtawm galaw nga ai rai nna Hpaji jawng bawng ring rawt jat wa ai masing hta yawng a ningmu hpe la nna mungdan ting na hpaji jawng ni jai lang lu na lam masan hpe ka shapraw lu na matu galaw nga ai re lam Ginjaw Hpaji Dap a Ningtau Amu Madu Sara kaba Hpunpyen Zau Hkyen tsun ai.

Hpaji jawng bawngring rawt jat na lam bawngban jahkrup ningmu kahkyin ai hta anhte a makau grup yin hte htap htuk ai masa, anhte a Mung shawa ni dang hkan lu na masa lam ni hpe Scope la nna anhte a htunghking laili laika ni hpe sharin achyin ai lam hte seng nna bawngban ai lam Sara kaba matut tsun ai.

Bawngban jahkrup ningmu kahkyin hpawng hpe Ginjaw Hpaji Dap kaw nna woi awn ai hte Ginwang Ginjaw shagu de na Hpaji Du ni, Laiza muklum kata na Hpaji Jawng Up ni, Jawngma Kanu Kawa ni, Jawng Komiti ni, Jawng Sharin Sara ni, Jawngma ni hte Mai Ja Yang IED Jawng Up ni sa du nna Jawng rawt jat na matu yawng a ningmu hpe jawm kahkyin ai ladat hte galaw ai re. Ndai bawngban jahkrup ningmu kahkyin lamang hpe Ginwang Ginjaw shara shagu hta mung galaw sa wa na rai nna du wa na January 24-25 ya laman hta Sinpraw Ginwang Ginjaw Mai Ja Yang kaw bai galaw sa wa na re hpe mung chye lu ai.

Wunpawng Mungdan Shanglawt Asuya Uphkang ginra kata hta Hpaji jawng 130 nga ai rai nna ya bawngban jahkrup ningmu kahkyin ai Jawng bawngring rawt jat lam masan hpe du wa na jawng lung ladaw nnan kaw na jai lang lu hkra hkyen shajin nga ai re hpe mung chye lu ai.

Leave a Reply

Your email address will not be published. Required fields are marked *