Kachin Alliance hte Jinghpaw Mung na makam masham hpung woi Sara kaba ni US Agency of International Development (USAID) hte hkrum shaga

Jinghpaw Mung kaw nna du sa ai Father Paul Awng Dang, Father John La Raw, Father Luigi hte Father Paul Tu Awng ni hte Kachin Alliance Ningbaw Nsang Gum San, Kachin Alliance N/T Amu Madu Tsumhpawng Seng Raw ni gaw Amerikan Asuya a Garum Ningtum Magam Dap Lithkam hte Burma Desk Officer yen hte rau USAID a rung daju Washington DC kaw hkrum shaga ai lam nga ai hpe chye lu ai.

USAID kaw nna Munghpawm Myanmar Mungdan hpe garum nga ai program ni hpe tsun jahpra dan nna $ 6,000,000 ga sadi garum ningtum hte seng nna tsun sanglang ai lam galaw ai hpe chye lu ai. KHCC N/T Ningbaw Father Paul Awng Dang hku nna mung garum gumhpraw ni hpe nawku hpung ni hte jauman buga CBO ni hpe dan tawk lu garum yang kaja ai lam, Miwa mung jarit mayan na hpyen yen dabang ni hta garum ningtum du ai yakhak ai lam hpe tsun tang madun ai lam nga ai re hpe chye lu ai.

Father John La Raw kaw nna Kachin Sate hte Shan State hta nanghpam lu sha manghkang hte seng nna tsun sanglang nhtawm US Asuya kaw nna kani nanghpam dawn ai lam hte AIDS hpaji jaw lam ni hta garum ningtum jaw ya na lam ni hpe tsun tang madun ai re. Father Luigi hte Father Paul Tu Awng yan hku nna mung anhte amyu sha ni hta nanghpam malu masha a majaw hkrum sha nga ai lam ni hpe tang madun ai lam galaw ai re hpe chye lu ai.

Hkrumzup hpawng hta Kachin Alliance hku nna mung Amyu Sha Hpaji lam hte Kachin Land hta Wunpawng amyu sha masha laning hte laning jahpan yawm wa ai lam, Ninghpam malu masha hpe Amyu Shamyit laknak hku nna lang ai lam, Asuya jawng/rung ni hta Jinghpaw laili laika ni hpe nsharin, njai lang ai shaning law law rai wa sai lam, Wunpawng amyu sha ni madu ai lamu ga ginra ni shaning hte shaning htawt sit shayawm ya ai lai ladat ni yawng hpe yu yang katsi ai ladat hte amyu shamyit masing (Silent Genocide) hpa rai taw nga ai lam ni hpe lai wa sai December shata 20 ya shani US Agency of International Development hte Washington DC kaw tsun tang madun bawngban ai lam nga ai hpe na chye lu ga ai.

Photo credit

Leave a Reply

Your email address will not be published. Required fields are marked *