Manje mare kaw Num sha langai Nhtu hte gahtam hkrum

Mungmyit Sinli Ga, Kutkai mare Manje lawk kaw shanu nga ai shayi Ji San Pan gaw January 26 ya shani Nhtu hte gahtam hkrum ai lam na chye lu ai.

Nhtu hte gahtam hkrum ai shayi sha gaw Salang Lamai Gam Seng hte Jan Maran Hkawn yan a kasha Ji San Pan  asak 22 ning rai nna shani chyingtung aten asak 10 ning jan daram re La sha marai manga Nhtu hte sa kahtam ai re hte ya aten machyi  masha hpe Kutkai Mung shawa tsi rung kaw tsi tsi gawn lajang ya nga ai lam na chye lu ai.

Ndai manghkang hta lawm ai marai manga hpe mare masha ni tam sagawn nga ai raitim ya aten du hkra n lu sagawn shi ai re hte Kutkai mare kata asak shi ning jan pang Ramma ni Nhtu laknak hpai share hkawm ai lam ni nga ai majaw Kutkai mare kata na Mung masha tsang nga ma ai lam buga masha ni shana wa ai kaw na chye lu ai.

Ndai zawn Myo mare kaba ni kaw mare masha ni hkrup mara dingsa hkrum ai, rai gashun hkrum ai manghkang ni lani hte lani law wa ai gaw Ramma ni Kani nanghpam hta hkrat sum mat ai majaw re nga nna buga masha ni tsun nga ma ai re.

Leave a Reply

Your email address will not be published. Required fields are marked *