KIA Masat (3) Dap Dung kaw ramma shawa sharin hpawng galaw

Sadung Ginwang, KIA Masat (3) Dap Dung Daju kaw February 4 ya shani kaw nna galaw ai Ginwang kata nga, makam masham hpung shagu na ramma ni shanglawm ai sharin hpawng kaba hpe February (7) ya shani du hkra angwi apyaw galaw la lu sai lam na chye lu ai.

Sharin hpawng hta Ninggawn Mung masa hte Wunpawng Mungdan Shanglawt Hpung Pati hte seng ai lam hpe Sadung Ginwang Komiti amu madu Salang kaba Wugyik Brang Nan kaw nna sharin ya ai rai nna, ya na zawn sharin hpawng galaw ai lam gaw Wunpawng Amyu sha ni hpe woi awn sa wa na lit lu ai ramma ni Wunpawng Mungdan Shanglawt Hpung a yaw shada nga ai masing masa lam ni hte woi awn nga ai lam ni hpe chye lu na matu sharin hpawng hpe woi awn galaw ai re lam na chye lu ai.

Sharin hpawng sa ai ramma ni gaw February 5 ya shani 60 lang na Mung shawa Shanglawt Rawt Malan Masat Ninghtoi mungga madat hkamla ai hpawng lamang hta Dap shawa Mung shawa ni rau shanglawm ai lam nga ai hte Dap Dung kata galaw ai ginsup shingjawng lamang ni hta mung shanglawm ai lam nga ai re hpe chye lu ai.

Sharin hpawng hta Waimaw ginwang hte Sadung ginwang kata na ramma ni marai 90 jan sa du sharin hkaja ai rai nna Shadung Ginwang kata lai wa sai shaning kaw nna ginwang kata nga ai ramma ni hpe Ninggawn Mung masa hte Wunpawng Mungdan Shanglawt Hpung Pati hte seng ai lam hpe sharin hkaja ai lam galaw nga ai re hpe mung chye lu ai.

Leave a Reply

Your email address will not be published. Required fields are marked *