Jaw Bum kaw February (5) ya shani shawa akyu hpyi hpawng galaw ai majaw KBC Sara (2) rim hkrum

February 5 ya shani Myitkyina, Nawng Nang Jaw Bum kaw shawa kyu hpyi hpawng lamang kaba galaw ai lam hte seng nna Jaw Bum Lithkam Rev. Bima Dau Lum hte Myitkyina ginwang Ramma ningbaw Sara Sumlut Tu Htang yan hpe February (6) ya shani Myitkyina Masat (1) Myen Asuya Balik Dap ni Jaw Bum kaw nna sa rim woi mat nna February (7) ya du hkra  jep chyoi ai lam galaw ai hpe na chye lu ai.

Sara yan hpe Feb (6) ya shani Myitkyina Masat (1) Balik Dap kaw jep chyoi lam galaw n htawm February (7) ya shana daw hta Tara Rung de bai shalai na matu hkyen nga ai hpe mung chye lu ai. Ndai lam hte seng nna KBC ningbaw Rev. Dr. Hkalam Sam Son hte WMR Salang ni February (7) ya shana de du hkra Myen Hpyen Dap Dingdung daw Dap Up Daju Taing Mu (တိုင္းမွဴး) hte sadu  bawngban jahkrup ai lam nga ai hte February (8) ya jahpawt hta gaw Sara yan hpe bai dat ya na lam shiga na lu ai re.

February (5) ya shani Jaw Bum kaw galaw ai Rawt Malan Masat Nhtoi akyu hpyi hpawng hta Shawnglawt  Rawt Malan hpang wa ai labau ni hpe hkrang shala ai lam, Amyu sha Dawnghkawn, Vinyl, Sticker ni wang lu wang lang jai lang ai majaw Myen Hpyen Dap kaw nna Sara yan hpe tara shawk shawn amu hpaw wa ai masa re nga nna buga masha ni tsun nga ma ai re. Ndai lam hte seng nna WMR kaw nna mung rung laika shapraw da ai hta amyu sha ni a rawt malan ai shaning (60) ning du wa sai, grau nna simsa ai maga de du lu na matu yaw shada let galaw ai lamang hta Tara Upadi hte n htan shai ai lam ni lawm na sai, hpang de ndai zawn re ai lam ni n byin hkra WMR hte KBC kaw nna atsawm hkrang shapraw sa wa na re lam rung laika shapraw da ai re hpe mung mu chye lu ai.

Leave a Reply

Your email address will not be published. Required fields are marked *