KBC Sara yan hpe Myitkyina Masat (1) Balik Dap kaw nna htawng kaba de htawt sit zing tawn da

Jaw Bum kaw February 5 ya shani akyu hpyi hpawng woi galaw ai lam hte seng nna rim da hkrum ai Jaw Bum Lithkam Rev. Bima Dau Lum hte Myitkyina Ginwang Ramma ningbaw Sara Tu Htang yan hpe Myitkyina Masat (1) Balik Dap kaw rim zing tawn da ai kaw nna February (11) ya shani Myitkyina Htawng kaba de shara htawt zing tawn da ai re hpe chye lu ai.

Sara yan rim hkrum ai lam hte seng nna February (7) ya shana daw hta KBC ningbaw hte WMR Salang ni Myen Mung Dingdung Daw Dap Up Daju Taing Mu (တိုင္းမွဴး) hte jahkrup bawng ban ai hta February (8) ya jahpawt dat ya na hku jahkrup la lu sai lam nga ai raitim n dat ya ai sha Matut naw zing tawn da ai re.

“Sara yan hte seng nna 2/3 ya laman teng man ai hku byin wa na hpe kam ai, KBC kaw nna mung ndai amu hpe gara hku matut galaw sa wa na ngu hpe gaw naw bawngban jahkrup sa wa na re. Mung shawa ni mung grai myit tsang gaw n ra na re, rawt malan n htoi gaw Wunpawng amyu sha ni malap n mai, n galaw n mai ai nhtoi re majaw shaning shagu galaw nga ai lam re ngu ai hpe seng ai ni hpe tsun dan nna myit hkrum lam lu yang gaw hpa n ra na re. Kadai shut ai, jaw ai ngu mung yawng chye taw ai re majaw Mung shawa ni mung akyu hpyi myit dum let nga ga” nga nna Rev. Dr. Maji La Wawm tsun ai.

February (5) ya shani Jaw Bum kaw galaw ai akyu hpyi hpawng hta Rawt malan hpang wa ai labau ni hpe hkrang shala ai lam, Amyu sha Dawnghkawn, Vinyl, Sticker ni wang lu wang lang jai lang ai majaw Sara yan hpe Jep chyoi na matu February (7) ya shani kaw nna Myitkyina Masat 1 Balik Dap kaw hkang zing tawn da ai re hte ya ten du hkra rai yang nhtoi bat mi de du wa sai re hpe chye lu ai.

Photo Credit

Leave a Reply

Your email address will not be published. Required fields are marked *