Corona Virus Ana hte seng nna shamu shamawt ai lam galaw

Ya yang Mungkan Mungdan law law hta chyam bra nga ai Miwa Gumsan Mungdan, Wuhan mare kaba kaw nna byin hpang wa ai Corona Virus ana hte seng nna Laiza Muklum kata kaw mung Jarit lai hkawm sa hkawm wa masha ni hpe jep joi ai lam ni galaw nga ai re.

Muklum kata kaw lai wa lai sa hkrunlam hkawm masha ni hpe Ginjaw Immigration hte Ginjaw Hkamja Dap ta gindun let hkamja lam hte seng ai jep chyoi ai lam galaw ai rai nna pru shang masha ni a mying jahpan ni hte phone hkring dat ni hpe matsing sumhting ai lam ni galaw nga ai re hte Miwa hkran de pru shang masha ni hpe n gup magap (mask) n lawm ai sha pru shang ai lam ni n galaw na matu sadi jaw ai lam galaw ai re hpe Hkamja Dap Magam Gun Tsi Saranum Htu San tsun dan ai kaw na chye lu ai.

Masha Pru Shang Gawn Hkang Makan Dap ( Immigration) kaw nna mung Miwa Gumsan Mungdan kaw nna du shang wa manam ni hpe manam jarawp hkan shayup ai lam ni n galaw na matu seng ang ai ni kaw nna matsun ai hte maren lit la galaw nga ai hte pru shang masha ni hpe jen jep ai lam ni galaw nga ai re hpe mung chye lu ai.

Sinpraw Ginwang Gijaw Mai Ja Yang Mulum kata hta mung Hkamja Dap hte Masha Pru Shang Gawn Hkang Makan Dap ni kaw nna pru shang masha jep chyoi ai hte hkamja lam gahtet shadang ni shadawn ya ai hta gahtet shadang law ai ni hpe seng ang ai Miwa Asuya de ap nhtawm Miwa Mung, Mung shawa tsi rung kaw nna lit la ai lam ni galaw na matu jahkrup nhtawm lahkawng maga jawm galaw nga ai re hpe Sinpraw Ginwang Ginjaw Masha Pru Shang Gawn Hkang Makan Dap kaw na Du Jum Wahpai Yawng Htang tsun ai kaw na chye lu ai.

Wunpawng Mungdan Shanglawt Asuya Ana Zinli Makawp Ninghkap Komit ni kaw nna mung jarit mayan hta nga ai Mungchying Mung shawa ni hte hpyen yen Mung shawa ni hpe n-gup magap (mask) ni garan jaw sa wa na masing ni nga ai re.

Muse Lahta Tsang Jawng kaw na jawngma ni hte jawngma kanu kawa Sara Saranum ni hpe mung Sam Mung Rapdaw Salang Duwa Kying Mai kaw nna Wuhan Corona Virus ana hte seng nna sadi maja tau nau makawp maga lam ni galaw na matu sa du hpaji jaw ya ai re hte n-gup magap (mask) ni hpe mung garan jaw ya ai re hpe chye lu ai.

Leave a Reply

Your email address will not be published. Required fields are marked *