Nam San Yang mare masha langai hkam bawm hte hkala hkrum

Nam San Yang mare kaw nga ai Salang Je Hpwi Ye asak 55 ning gaw February 14 ya shani mare makau, Nbu Yang maga de Nga hkwi sha sa ai kaw hkam bawm kabye kapaw hkrup nna pai maga lagaw hkra hkala mat ai lam chye lu ai.

Hkala hkrum ai Salang Je Hpwi Ye hpe ya aten Laiza Mung shawa tsi rung kaw tsi gawn lajang ya ai lam galaw nga ai re hpe mung chye lu ai.

Nam San Yang mare gaw hpyen majan a majaw gan yen da ai mare rai nna Myen Hpyen Dap M.P.Hk (ေျမာက္ပိုင္းတိုင္း စစ္ဌာနခ်ဳပ္) a masing kata kaw lai wa sai 2018 ning December shata kaw nna bai wa nga hpang ai mare re. Raitim Nam San Yang mare masha law malawng gaw hpyen yen dabang ni hta naw shingbyi nga ma ai re hpe chye lu ai.

Simsa Shimlum lam hkam daga n nga shi ai ten kaw wa nga ai re majaw wa nga ai mare masha ni mung mare shinggan de tam lu tam sha na matu myit tsang ai lam ni nga ai hta lai wa sai November 29 ya shani mung Nam San Yang mare makau Pau Se Bum kaw Myen Hpyen Dap hte KIA ni ang katut gasat gala byin ai majaw Nam San mare masha ni hkrit kajawng ai lam nga ai re. M.P.Hk kaw nna Nam San Yang mare masha ni hpe dumbri dumbra n galaw na matu matsun shana ai lam mung nga lai sai re hpe chye lu ai.

Leave a Reply

Your email address will not be published. Required fields are marked *