Jahtu Zup gat nnan gawgap na matu tawn da ai hpun pyen ni hpe Asuya ni rim zing ya

Lai wa sai 2019 December 30 ya shana wan hkru sum mat ai Jahtu Zup gat wang hpe nnan bai gaw gap na matu tawn da ai hpun pyen ni hpe Mugong Asuya Nam Kawn ni February 18 ya shani sa rim zing kau ai lam na chye lu ai.

Gat komiti ni kaw nna garum ningtum gumhpraw hte gat nnan gaw gap na matu mari mahkawng tawn da ai hpun pyen Ton 50 jan hpe tara n shang ai nga nna seng ang ai Asuya Mugong Nam Kawn ni sa rim kau ai re lam buga masha langai shana wa ai.

Jahtu Zup gat wang nnan gaw gap la lu na matu gat komiti ni, mare uphkang Salang ni hte mare masha ni kaw nna seng ang ai uphkang Salang ni hpang de ahkang hpyi laika bang nna tang shawn da ai lam hta shata 2 jan na wa tim shiga shana wa ai lam n nga ai majaw gat wang lamu ga shara da ai masa sha naw re lam buga masha ni tsun ai.

Gat nnan n lu gaw gap shi ai majaw gat dut mari ai lam hpe ginsum kasha gap la nna dut lu dut sha ai ni nga ai zawn nkau gaw lam makau hkan dut sha nga ai re hpe mung chye na lu ai.

Leave a Reply

Your email address will not be published. Required fields are marked *