Rim zing hkrum ai KBC Sara yan a mu dawm sai

Myitkyina, Jaw Bum kaw February (5) ya shani galaw ai akyu hpyi hpawng lamang hte seng nna rim hkrum ai Rev. Bima Dau Lum hte Myitkyina Ginwang Ramma Hpa-awn Sara Sumlut Tu Htang yan a amu hte seng nna KBC Salang ni, WMR Salang ni hte Dingdung Daw Myen Hpyen Dap Salang ni bai bawngban jahkrup ai hpang February 20 shana daw hta Sara yan a amu hpe Myen  Hpyen Dap kaw nna dawm kau ya sai lam chye lu ai.

Sara yan hpe February 6 ya kaw nna amu hpaw jep chyoi n htawm Myitkyina Masat (1) Balik Dap kaw zing tawn da ai rai nna February 11 ya shana de gaw Sara yan hpe hkyuk htawng kaba de bai htawt tawn da ai re. Sara yan hte rau WMR Ramma ningbaw Sara Daihpa Lung Awng hte Sara Zau Jat yan hpe mung အမွဳတြဲ hku nna amu hpaw da ai re hte February 20 ya shana daw hta gaw Myen Hpyen Dap maga kaw nna amu dawm la sai re hte Sara yan mung lawt pru sai lam Sara yan a amu hpe hkan ya nga ai Rev Dr. Maji La Wam tsun ai kaw na chye lu ai.

Jaw Bum Lithkam Rev. Bima Dau Lum hte Myitkyina ginwang Ramma hpa-awn Sara Sulut Tu Htang yan hpe February (5) ya shani Jaw Bum kaw  akyu hpyi hpawng galaw ai hta Shawnglawt  Rawt Malan hpang wa ai labau ni hpe hkrang shala ai lam, Amyu sha Dawnghkawn, Vinyl, Sticker ni wang lu wang lang jai lang ai majaw Jep chyoi na matu rim woi mat ai re.

Sara yan lawt wa na matu February praw 7 ya shana daw hta mung KBC ningbaw hte WMR Salang ni Dingdung Daw Dap Up Daju (တိုင္းမွဴး) hte hkrum shaga nna February 8 ya jahpawt dat ya na lam tsun ai raitim ndat ya rai sha Htawng kaba de bai htawt sit ai re. Sara yan hpe amu hpaw rim zing tawn da ai gaw nhtoi 14 ya na ai hpang she dat ai re hpe mung chye lu ai.

Leave a Reply

Your email address will not be published. Required fields are marked *