Laiza Muklum kata Corona Virus hte seng nna ntsen nhten masha jep n mu

Laiza Muklum kata lawk shagu hte Mungdan pru shang shagyit kaw hkamja lam jep chyoi ai bungli hpe galaw nga ai hta Corona Virus kap ai ngu ntsen nhten ai masha garai jep nmu ai lam Laiza Muklum Uphkang Rung kaw na chye lu ai.

Muklum kata Corona Virus hpe tau hkrau makawp maga ai lam hte Mungchying Mung shawa ni hkamja lam shimlum lam nga na matu February 20 ya shani kaw nna jep chyoi ai lam galaw ai hta February 24 ya shani du hkra rai yang masha marai 5000 jan hpe jep chyoi ai hta laklai dawn jan ai masha hpe jep n mu ai lam hkamja lam jep chyoi bungli hpe woi awn galaw ai Laiza Muklum Ningtau Uphkang Du Salang kaba Myitung Chyang Bawm tsun ai.

“Muklum kata hkamja lam hte seng nna jep chyoi ai lam hpe galaw lu ai raitim Laiza muklum kata pru shang masha law ai majaw masha pru shang shagyit ni hta gaw dingyang naw jep chyoi ai lam galaw na re. Mungchying Mung shawa ni kaw nna mung hkamja lam ningra wa ai lam nga yang ni nawn ai tsi rung tsi jaw gawk ni hta lawan tsi gawn lajang hkam la nna hkamja lam hpe sadi sahka hkan sa na ga” nga nna Salang kaba matut tsun dan ai.

Hkamja lam jep chyoi ai lamang hpe Wunpawng Mungdan Shanglawt Hpung Ginjaw Komiti a lam masan kata Mungchying Uphkang Dap Ginjaw Rung kaw na dawdan minit hte Magam Dap Makan Dap ni hte ta gindun nna galaw ai re hpe chye lu ai.

Leave a Reply

Your email address will not be published. Required fields are marked *