Yuzana company ni mare masha ni a yi sun hkauna ni hta Nai Kadung hkai kau ya

Danai Lido lama mayan kaw yi sun  hkauna galaw sha nga ai Mung mare masha ni a yi wa 3 hpe lai wa sai February 22 ya shani Yuzana company ni wan nat jahten kau ya nna March 16 ya shani kaw nna Nai Kadung hkau kau ya ai lam galaw ai hpe Hugawng ginra Mungchying Rawt Jat (MRJ) ningbaw Salang Tang Gun shana ai kaw na chye lu ai.

“Yuzana company ni gaw hkauna madu ni wa mat ai hpang wan nat jahten kau ai re, shawoi shaning hta dai ning gaw laklai ai masing ni nga nna masa nga ai hte mare kahtawng shagu ndai zawn manghkang ni grai shabyin ai” nga nna MRJ ningbaw tsun dan ai.

“Ndai zawn manghkang ni shabyin ai a ntsa anhte amyu sha ni a lamu ga, ji woi ji wa ni uphkang hkrak wa ai lamu ga hpe Mungchying Mung shawa ni yawng uphkang lu hkra Mungchying Mung shawa ni myi hpaw ra sai, lamu ga hte ginra makawp maga ai lam hta Mung shawa yawng shanglawm let n gun dat sa wa ga” nga nna mung Salang wa matut tsun ai re.

Yuzana company ni Nai Kadung hkai kau ya ai sun ni gaw Awng Ra mare na Salang Kumhtat Naw Kyi, San Pra mare na Salang La Ah Di, Jahtu Zup mare na Salang Mung Ra hte San Pra mare na Jan Hkachyang Lu ni a yi sun hkauna ni re hpe Myu Sha Pyen  shana wa ai kaw na chye lu ai.

Photo Credit; MRJ

Leave a Reply

Your email address will not be published. Required fields are marked *