Laiza Muklum hte Pru Shang shara ni hta Corona Virus ana n kap bra hkra tau hkrau makawp maga jep chyoi lam galaw

Wunpawng Mungdan Shanglawt Asuya, Mungdan Hkamja Dap kaw nna woi awn ai hte Laiza Muklum kata de pru shang ai shagyit shagu hte manam pru shang shara ni hta Corona Virus kap bra ana makawp maga ninghkap lu na matu ahkyak la jep chyoi ai lam galaw nga ai re hpe chye lu ai.

“Corona Virus (shnr) Covid 19 kap hkrum ai masha gaw madung hku nna hkum kahtet shadang tsaw ai kumla madun ai re majaw pru shang shagyit ni hta hkum kahtet shadang shadawn ya nna pru shang masha shagu a hkawm sa hkrunlam matsing ningting ni hte matut mahkai hkringdat Information ni hpe hta kahkyin ai lam galaw ai re. Hkamja lam jep chyoi ai lam galaw ai hta kahtet shadang 38 a lahta byin hkrum ai ntsen nhten ai masha ni hpe laksan gawn lajang na matu mung hkyen shajin da ai” nga nna Mung Lai Hkyen shagyit kaw hkamja lam jep chyoi bungli gun hpai nga ai Hkamja Du Nbwi Hkawn Nu tsun ai.

Corona Virus kap bra ana hpe makawp maga ninghkap ai lam hta hkum ding dek makawp maga ai lam hpe galaw na matu hte lata san seng hkra tawn na matu mung Hkamja Du kaw nna matut tsun ai.

Laiza Muklum hte makau grupyin masha pru shang shara ni hta lai wa sai February (12) ya shani kaw nna Corona Virus ana makawp maga na matu jep chyoi ai lam hpe galaw nga ai hta kahtet shadang tsaw ai ntsen nhten ai masha marai 2 hpe jep chyoi mu lu ai raitim ya aten hta hkamja mai tsai sai lam nga ai re hpe mung chye lu ai.

Leave a Reply

Your email address will not be published. Required fields are marked *