Covid 19 Ana Zinli Makawp Ninghkap bungli hpe tang du ai hte galaw lu na matu ra ahkyak bawngban dawdan ai lam galaw

Wunpawng Mungdan Shanglawt Hpung, Ginjaw Komiti kaw nna hpaw shagrin tawn da ai Covid 19 Ana Zinli Makawp Ninghkap Komiti bungli bawngban zuphpawng hpe March (25) ya shani, Laiza Muklum Padang hkrunlam majan masing woi awn rung zuphpawng gawknu kaw galaw ai lam nga ai.

Zuphpawng hta ya aten anhte a makau grup yin hta byin hkrum nga ai Covid 19 ana zinli hpe ninghkap ai hku nna ya galaw nga ai lam ni hta grau nna tang du ai hku galaw lu na matu pat hkum ra ai lam ni hte ana zinli makawp ninghkap lu na matu matut mahkai galaw ra ai lam ni hte seng nna bawngban dawdan ai re lam Covid 19 ana zinli makawp ninghkap komiti amu madu Du kaba Lahpai Hing Wawm tsun ai kaw na chye lu ai.

Ya aten Ginjaw Ginra hte jarit mayan prushang shagyit shara 12 hte mare kata hkan Mung shawa ni hpe hkamja lam jep chyoi ai lam galaw nga ai rai nna Mung shawa ni nan mung ndai ana hpe sadi makawp maga ai lam hta n gun dat galaw sa ra ai lam Covid 19 ana zinli makawp ninghkap komiti amu madu tsun ai re.

Covid 19 ana zinli makawp maga komiti hpe lai wa sai February praw 7 ya shani kaw nna hpaw masat nhtawm ana ninghkap makawp maga ai lam ni hpe woi awn galaw nga ai hta komiti kaw na galaw nga ai magam bungli ni hte Covid 19 ana zinli makawp maga ninghkap komiti hpe ndai ana zinli hkoi wa ai du hkra hpaw shagrin nna woi awn galaw sa wa na re hte Covid 19 ana zinli makawp ninghkap komiti ningbaw lit hpe gunhpai nga ai Wunpawng Mungdan Shanglawt Hpung, Ginjaw Komiti Tingnyang Up Malai (II) Sara Kaba Sumlut Gam tsun dan ai.

Hpawng hta Ginjaw Ginra kata hte Sinpraw Ginwang Ginjaw kaw na lit nga ai magam gun Salang ni, Magam Dap shagu na lit nga ai Salang ni, Laiza Muklum kata nga ai NGO wuhpung wuhpawng ni, CSO ni marai 40 jan sa du shanglawm ai hte bawngban dawdan ai re hpe chye lu ai.

Leave a Reply

Your email address will not be published. Required fields are marked *