Ginjaw COVID-19 Ana Zinli Makawp Ninghkap Komiti Salang ni kaw nna Quarantine dabang hpaw shagrin ya

Ginjaw COVID-19 Ana Zinli Makawp Ninghkap Komiti kaw nna matsun ai hte maren Pajau Sha-it Yang hte Hpalap Naru kaw hpaw da ai Quarantine dabang hpe May 16 ya shani tara shang hpaw masat sai re hpe chye lu ai.

Dabang nnan hpe Ginjaw COVID-19 Ana Zinli Makawp Ninghkap Komiti Amu Madu Du kaba Lahpai Hing Wawm hte Komiti malawm, Shiga Magam Dap Lithkam Du kaba Nhpang Naw Bu sa du shagrin ya ai re.

“Hpalap Naru Quarantine dabang kaw masha marai 15 hte 20 lapran a matu shara hkyen lajang da ai rai nna, Miwa ga hte Myikkyina de na pru shang galaw ai masha ni hte ntsen nhten ai masha ni hpe tawn na matu galaw da ai re” nga nna Hpalap Naru Quarantine Dabang  Komiti malawm Dukaba Tum Kam tsun ai.

COVID 19 Ana Zinli Makawp Ninghkap Komiti malawm Shiga Magam Dap Lithkam Du kaba Nhpang Naw Bu kaw nna Check point hte Quarantine shara masat da ai lam hpe tsun sanglang dan ai rai nna “Check point a magam bungli hta madung gaw masha a hkam ja lam hpe lit la jep ra na hte arung arai, masha, hte mawdaw ni hpe jep ai hku n rain a hte Quarantine tawn ai ngu ai mung hkamja lam hte seng nna tawn ai rai nna ntsen nhten jang Quarantine tawn nna tsi gawn lajang ai lam re” nga nna hpaji jaw matsun ai ai hpe chye lu ai.

Sha-it Yang Quarantine dabang kaw gaw Quarantine masha marai 22 nga magang sai rai nna dabang hta ap nawng yu reng nga ai ramma ni a matu malu masha mayak nga ai lam Pajau Sha-it COVID-19 Ana Zinli Makawp Ninghkap Komiti kaw na chye lu ai.

Quarantine rawng ai masha ni hte apnawng ni a matu malu masha hpe Ginjaw Covid 19 Ana Zinli Makawp Ninghkap Komiti hte NGO ni kaw nna N-gu, ra ai arung arai ni hte marai langai a matu lani mi shat mai gumhpraw, Miwa gumhpraw Yaun 10 masat da ya ai raitim garai ndu shi ai lam rai na re nga nna Ginjaw COVID-19 Ana Zinli Makawp Ninghkap Komiti Amu Madu Dukaba Lahpai Hing Wawm tsun ai.

KIO uphkang ginra kata tara shang hpaw da ai Quarantine dabang (8) rai sai hte masha marai 400 jan hkamja lam maram masam hkam la nga ai re hpe Ginjaw COVID-19 Ana Zinli Makawp Ninghkap Komiti kaw na chye lu ai.

Leave a Reply

Your email address will not be published. Required fields are marked *