Myen Hpyen Dap, Dap Up Daju A Gawng Malai Salang ni KIO Ginjaw COVID-19 ana zinli makawp ninghkap Komiti Salang Ni Hpe Sa Hkrum

Myen hpyen dap Dapup Daju laksan shangun dat ai salang ni kaw nna KIO Ginjaw COVID-19 ana zinli makawp ninghkap Komiti slg. ni hpe May.20 ya shana de hkying 1:00 aten laman KIO uphkang ginra Maisak pa quarantine dabang kaw sa du hkrum shaga let COVID-19 ana zinli makawp maga lam hta jai lang na rung rai ni sa du garum jaw ai re.

Du sa wa ai Myen Hpyen Dap, တပ္မေတာ္ကာကြယ္ေရး ဦးစီးခ်ဳပ္ရံုး၊ တဲြဖက္စစ္ေရးခ်ဳပ္ ဗိုလ္ခ်ဳပ္ ခြန္သန္႔ေဇာ္ထူး woi awn ai hpung hte Wunpawng Mungdan Shanglawt Kongsi Ningbaw Malai (1) Lat Du Daju Jum, Sumlut Gun Maw hte KIO COVID-19 makawp ninghkap komiti Ningbaw Sara Kaba Sumlut Gam woi awn ai Komiti salang ni kaw nna Maisak Pa Quarantine dabang kaw hkap tau hkalum ai lam galaw ai re.

Sara Kaba Sumlut Gam kaw nna Myen Hpyen dap de na Du Salang ni ya na zawn sa du n-htawm COVID-19 ana zinli makawp maga ai hta jai lang na rung rai ni hpe sa du garum jaw ai majaw chyeju dum ai lam, kabu gara hkap tau la ai lam hte matut nna mung ta gin dun let COVID-19 ana zinli hpe makawp maga sa wa na matu tsun ai. 

ဗိုလ္ခ်ဳပ္ ခြန္သန္႔ေဇာ္ထူး kaw nna gaw sa du garum jaw ai rung rai ni hpe hkap la nna jai lang nga na matu, matut nna mung ra wa ai lam ni nga yang matut mahkai mai ai lam, ya na zawn hkrum zup let tsawra myit madun lu ai majaw kabu ai re hte hkrum zup lu ai lam gaw myit makam hpe gawgap lu ai lam mung re nga nna tsun ai. 

Wunpawng Mungdan Shang Lawt Kongsi(KIC) Ningbaw Malai (1) Lat Du Daju Jum, Sumlut Gun Maw kawn rung rai ni garum jaw ai majaw chyeju dum ai lam hte ra wa ai shara ni hta akyu jashawn jai lang sa wa na lam, COVID-19 ana zinli makawp ninghkap ai lam hta rau ta gin dun nna shada myit makam gaw gap la n-htawm simsa lam hpe mung gawgap sa wa na matu myit mada ai lam tsun ai.

N-dai hkrum zup ai lam hpe Peace Talk Creation (PCG) kawn lapran shang matut makai ya ai rai nna lai wa sai May (13) ya shani hta mung KIO COVID-19 ana zinli makawp ninghkap Komiti ni slg. hte Jinghpaw Mungdaw Asuya Shinggyim lam hkringmang slg. U Nye Win woi awn ai Uhpung ni hkrum zup let COVID-19 ana zinli makawp maga lam hta rau ta gindun galaw sa wa na lam ni hpe bawngban ai lam galaw sai re.

Leave a Reply

Your email address will not be published. Required fields are marked *