Maw Hpawng, Prat Ningnan Chyum Laika sharin dabang na Sara Lahkye Seng Awng a amu hpe May 27 ya shani jep na

ဆက္သြယ္ေရးပုဒ္မ (၆၇) hte amu hpaw da hkrum ai Maw Hpawng Prat Ningnan Chyum sharin dabang a magam gun Sara Lahkye Seng Awng a amu manghkang hte seng nna du wa na May 27 ya shani Myitkyina Tara Rung (ျမိဳ႕နယ္တရားရံုး) kaw san jep ai lam galaw na re hpe Maw Hpawng Prat Ningnan Chyum sharin dabang Lithkam tsun ai kaw na chye lu ai.

Ndai manghkang hte seng nna ahkyak la hparan ya na matu Maw Hpawng Prat Ningnan Chyum laika sharin dabang lit nga ai Salang ni kaw  nna mung Jinghpaw Mungdaw Asuya,  Myen Mung Gumsan Magam Rung hte Myen Hpyen Dap Dap Up Daju Min Aung Hlaing hpang de du hkra laika bang ai lam nga sai rai tim dai amu hte seng ai hpe Tara Rung kaw nna htang shana ai lam n nga ai majaw tara shawk shawn da ai hpe shangut kau sai shadu ai lam Dabang Lithkam Sara Pungga Seng Hpa tsun ai.

“Jinghapaw Mungdaw Asuya kaw na mung ndai amu hte seng nna shakut ya na nga tsun htang ai majaw amu ndai ngut mat sai shadu ai re.”

Ndai amu hte seng nna May 19 ya shani shawng nnan lang tara shawk shawn da hkrum ai maga de na lit nga ai ni hpe Tara Rung kaw nna shaga ai hte hkrum shaga ai lam galaw ai lam nga ai rai nna amu hpe du wa na May (27) ya shani matut jep chyoi sa wa na re lam hte amu shawk shawn da hkrum ai Sara Seng Awng hpe gaw pahkam (အာမခံ) jaw da ai re majaw shi a nta kaw rai nga ai lam hpe mung chye lu ai.

Sara Lahkye Seng Awng hpe ahkyak la da ai lam gaw 2019 September (26) ya jahpawt hking 3:00Am daram hta Myen Hpyen Dap hte Balik Dap ni kaw nna dabang kata tsun shana da ai lam n nga, shang jep ai kaw dabang kata jai lang ai ga shaga jak hpe mu hkrawk jep ai majaw dai aten dabang kata ritkawp tara gawn hkang lit ang ai Sara Seng Awng hpe Myitkyina Masat (2) Balik Dap kaw na tara shawk da ai re hpe chye lu ai.

 

Photo Credit; Kachinwaves

Leave a Reply

Your email address will not be published. Required fields are marked *