(9) NING HPRING SAI

By; Maling Utu

N dum na ngu tim dum wa, malap sana ngu tim n malap. Myen Hpyen Dap ni KIA hpe htim gap ai gaw 2020 ning June (9) ya hta (9) ning hpring sai re.

2011 ning June 9 ya shani KIO a Sang Gang Kyithkai rung hpe htim gap masai. KIA gaw majan shazim na matu မပခ တိုင်းမှူး ဗခ ဇေယာ အောင် hpe June 13 ya shani hkying 12:00 hta hpang jahtum tawn, majan shazim na matu tara shang laika hte shana sai raitim n jahkring ya ai majaw KIA ni mung Mungdan ting koi yen n lu ai ninghkap majan hpe baw dat sai re.

Mung shawa ni yawng Hpyen yen hkawm ra mat sai. N kau mi KIO uphkang ginra Miwa Mung jarit mayan de du mat nna dai ni du hkra hpyen yen dabang (23) Nta htinggaw (2,311) hpyen yen masha (37,000 ) jan, tinang a mare buga de kalang pyi bai n du yu sai ni law law nga ma ai.

Nkau mi Myen Asuya uphkang ginra Myu mare kaba de Jinghku machyu, Nawku hpung machyu let Hpyen yen du mat ai gaw daini du hkra Hpyen dabang (172), Nta htinggaw (13,623), Hpyen yen masha ( 70,242 ) rai nna, Hpyen wa a man, lu sut lu su ai maigan amyu ni a man hta, nga shara malu masha ayak ahkak,kaya jahpa rai nga pra ra saga ai.

Anhte a Wunpawng buga kata mare (400) jan, Nawku jawng (300), Laika sharin jawng (120), Ma shalet jawng (130), Tsi rung Tsi gawk (260), kaga Mung shawa ni a kan bau bungli jak rung kaji ni law law jahten kau ya masai, kabai kau da ra mat sai, galoi she bai gawgap la lu sana?

Myen Asuya, Myen Hpyen Dap ni gaw Mung shawa hpe makawp maga ai, Mung shawa akyu ara hpe gun hpai ai, Mung shawa a gawng malai tai ya ai rai ga ai nga nna shani shana marawn nga tim, anhte Hpyen yen ni hpe hpa baw wa garum ya masai kun? Garum na matu sa wa ai, NGOs, INGOs, UN wuhpung wuhpawng ni hpe pyi shang na ahkang n jaw ma ai, Mungkan wuhpung wuhpawng ni mung Myen Asuya a ga madat nna anhte hpe gaw n yu mat sai, n mu mat masai.

Myen hpyen wa a zai ladat gaw Mungkan wuhpung wuhpawng ni mu yang Mung shawa ni a ntsa shanhte tawt lai ai mara dan dawng na tsang ai majaw magap shakut nga ma ai. Maga mi gaw Mung shawa ni hpe da sang jam jau jaw ai, matsan shangun ai, ramma ni a hpaji lam pat kau ya ai, KIO a n gun hpe shadaw kau ya na, rawt malan bungli hta myit n lawm shangun ai, KIO hte Mung shawa ni hpe jahka kau na, rawt malan bungli hpe jahten sharun gintum mat shangun ai zai ladat mung rai nga malu ai.

Anhte a Mung masa pandung gaw Awmdawm Ai Gumrawng Gumtsa Mungdan gaw sharawt la na ngu ai re. Dai pandung de n du dingsa kaning re ai Mung masa hpyen masa mawru kaba hkrum tim hkamjan lu ai atsam gaw amyu sha ni hta nga ra na ga ai. Amyu sha ni a rawt malan dawhpum dawnu gaw Mung shawa ni re, Hpyen yen nga ai mung rawt malan bungli nan rai nga ai. Shanglawt lu na matu matsan jamjau hkam let n gun madun nga ai lam mung rai nga ga ai.

Hpyen yen tsin yam a majaw amyu sha ni a lawt lam hpe jahten kau ai n re sha, hpyen wa hpe maroi nni masin n si ai myit hte amyu sha myit masa makam kri tawng hpe madaw gawgap la na aten rai sai.

Hpyen yen prat galoi she hkoi mat sana ngu myit marai hpe shagrit shayawm kau na malai Amyu sha lam hpe gawgap la let rawt malan hkrunlam rai nga ai hpyen yen hkrunlam hta n gun dating let myithkrum nga ga ngu n gun jaw dat nngai law.

Leave a Reply

Your email address will not be published.