Kachin National Youth Network uhpung kaw nna manu jahpu n la ai sha lata hpaji sharin ya na

Kanbau magam bungli hta kaja wa myit lawm ai ni hpe Kachin National Youth Network uhpung kaw na woi awn let Online hku nna manu jahpu n la ai sha lata hpaji sharin ya na re lam chye lu ai.

COVID-19 ana zinli a majaw dum nta kaw sha nga ra nna kanbau magam bungli yak hkak nga ai ni hpe kanbau magam bungli lu ai sha n-ga shang gumhpraw mung lu na matu Jinghpaw Wunpawng Ramma Hpung Zinghkri (Kachin National Youth Network) kaw nna June 25 ya shani kaw nna July 4 ya shani du hkra nhtoi 10 ya Online hku nna lata hpaji ni hpe sharin ya ai re lam Kachin National Youth Network hpung kaw na chye lu ai.

Sharin ya na ginhpan ni gaw nhpye hpan amyu myu hte aten hpring jai lai mai ai lata hpaji hpan amyu myu hpe sharin ya na rai nna sharin manu n la na re hte sharin ai hta lang na arung rai ni hpe mung Kachin National Youth Network hpung kaw nna garan jaw ya na re. Myit lawm nna sharin hkaja mayu ai ni mung Kachin National Youth Network page kaw mara da ai shawk shawn form hpe download galaw la n-htawm jaw da ai phone hkring dat hpe matut mahkai let shawk shawn mai ai lam chye lu ai.

Lata hpaji sharin hkam la nna ta tut magam bungli hta kung kyang nna arung rai kaja gyin shalat wa lu ai rai yang Kachin National Youth Network kaw nna arung rai ni hpe gat lawk de matut mahkai dut shabra ya ai lam ni galaw ya na re hpe mung chye lu ai.

Leave a Reply

Your email address will not be published. Required fields are marked *