COVID-19 ANA THE SENG NNA MUNGSHAWA DE N DAU SHABRA AI LAM

Tsawra Hkungga ai Mungchying Mungshawa ni hte Dap shawan ni hpang de tang madun dat ga ai.

Ya aten hta, Myen Mungdan kata COVID-19 ana kap bra nga ai madang gaw tsaw ding yang naw rai nga ai hpe mu lu ai. Anhte a ginra makau Loi Je hte htingbu Miwa Gumsan Mungdan, Dehong ginra hta mung ndai laman

COVID-19 ana kap ai masha  bai mu jep ai hpe na lu ga ai.

Jinghpaw Mungdaw kata COVID-19 ana kap bra ai masa hta hkan nna, tinang Uphkang ginra kata de masha pru/shang hkawm sa ai lam, Kun rai htaw shalet la ai lam ni hpe pat hkum da ai aten grai na wa sai re majaw, Mungshawa, Dap shawa ni myit ru myit pu yak hkak ai lam ni grai nga na re ngu myit dum ga ai.

Yak hkak dut dang jam jau ai lam ni hpe hkam sharang nna hkam jan lu hkra jawm shakut sa wa ra na ga ai. Ndai zawn jawm shakut shaja nga ai lam gaw COVID-19 ana zinli hpe padang dip la lu na matu rai nga ai.

COVID-19 ana kap bra ai aten ladaw galu wa ai hte maren, COVID-19 ana zinli makawp ninghkap komiti kaw nna, Mungshawa ni hpe garum shingtau lu hkra ladat shaw masing gran nga ga ai. Tinang Uphkang ginra kata malu masha ra kadawn wa ai lam n nga hkra mung galaw shajin da ai hte gat rai manu ni grai tsaw rawt wa ai lam n nga hkra mung ding yang yu maram nga ga ai.

Myen Mungdan kata COVID-19 ana chyam bra ai lam n yawm mat ai re majaw Mungchying Mungshawa ni hte Dap shawa yawng grai naw sadi maja let, COVID-19 ana zinli makawp ninghkap komiti kaw nna jahkrat da ai tarawng tara ni hpe matut hkan nang hkan sa nga ga ngu lajin dat ga ai.

COVID-19 ana zinli makawp ninghkap komiti gaw pat hkum da ai tinang Uphkang ginra kata masha pru/shang ai lam, Kun rai htaw shalet la ai lam ni hte seng nna ding yang yu maram dinglik nga ga ai. Dai re majaw, COVID-19 ana zinli kap bra ai masa sat lawat hta hkan nna, htuk manu wa ai ten hta pat hkum da ai lam ni hpe bai hpaw sa wa na re lam tang madun ndau shabra dat ga ai.

 

 

 

Ginjaw COVID-19 Ana Zinli Makawp Ninghkap Komiti

2020 ning November (13) ya

Leave a Reply

Your email address will not be published.