Ginjaw Hpaji Dap Kaw Nna Jawng Ningja Rawt Jat Masing Hpe Woi Awn Galaw Nga

Ginjaw Ginra Ginwang Ginjaw kata hpaw tawn ai Jawng up ni Hpaji Du ni hpe January (13) ya shani kaw nna January (19)ya shani du hkra Laiza kaw Jawng Ningja rawt jat masing lam hte seng ai wunkat sharin bawngban ai lam galaw ai hpe chye lu ai.

Jawng Ningja Rawt Jat Masing wunkat hpe Ginjaw Hpaji Dap kaw nna woi awn nhtawm, Jawngma ni hpaji hkaja ai lam hta grau nna madi shadaw ya lu na lam hte Hpaji Jawng ni hpe grau nna rawt jat wa hkra galaw ai masing re lam, Wunkat hpe ta tut woi awn nga ai Ginjaw Hpaji Dap Ningtau amu madu Sara Kaba Hpun Pyen Zau Hkyen tsun ai.

Ndai ya anhte galaw nga lamang hpe Jawng Ningja Rawt Jat masing (JNRM) ngu nna shamying da ga ai, Hpaji Du ni hte Jawng up atsang ni hpe TOT sharin ai lam galaw nga ai.Jawng rawt jat wa  na matu hkang zing makawp maga ai lam ni hpe sharin nga ai re

Wunkat hpe Laiza Hotel zuphpawng gawk kaw 3ya jaw nhtawm, Je Yang lapran tsang jawng kaw 3ya ta tut bungli shang ai hku nna, Jawng komiti ni, Jawngma kanu kawa ni, Jawng sharin sara/ saranum ni, Jawngma ni shanglawm ai hte bawngban jahkrup ningmu kahkyin ai lam hpe galaw ai re lam Sara Kaba matut tsun ai.

 “Laiza hotel kaw 3ya Hpaji Du ni, Jawng up ni chye ra ai lam atsam ningja ni hpe shawng wunkat jaw ai re, dai ngut ai hpang January 16,18,19 ni hta Je Yang lapran tsang jawng kaw gaw ta tut jawng rawt jat lam masing hpe soi ai lam galaw ga ai re”

Ginjaw Hpaji Dap kaw nna woi awn galaw nga ai Jawng Ningja Rawtjat masing hpe lai wa sai shaning kaw nna hpang nhtawm galaw nga ai hta, November hte December shata hta Dingdung ginwang Ginjaw Hpaji Dap hta magam gun nga ai Hpaji Du ni, Jawng Sr/Srn ni hpe wukat jaw ai lam galaw ai rai nna, Ginjaw Ginra ginwang ginjaw hta Numbat lahkawng lang galaw ai re hpe chye lu ai. Matut nna mung ndai Jawng Ningja Rawt Jat masing hpe Ginwang Ginjaw shagu hta jaw sa wa na lam nga ai re hpe mung chye lu ga ai.

 

Leave a Reply

Your email address will not be published. Required fields are marked *