KIO uphkang ginra hta Langu a malai kaga hkai lu hkai sha masing hpe galaw sa wa na

KIO uphkang ginra kata hta langu a malai kaga hkai lu hkai sha hkai reng masing ni hpe 2021 shaning kaw nna galaw sa wa na matu galaw sa wa sana re lam chye lu ai.
N-dai masing hpe Wunpawng Mundan Shanglawt Kongsi KIC kawn masing jahkrat n-htawm uphkang dap, Asuya Ginwang Ginjaw ni ta gin dun let galaw sa wa na hta hkai rem magam dap kawn lit la woi awn nna tinang uphkang ginra na langu hkai masing hpe dawm kau nna mungshawa ni a akyu ara hkam la lu hkra kaga hkai rem, hkai lu, hkai sha masing ni hpe galaw sa wa ai re lam Laiza Ginwang Uphkang Du Salang Kaba Gawje Yaw San tsun ai.
“Langu hkai ai shara dai ni hpe n-dai Mundan Asuya hkai rem kaw na lit la n-htawm hkai rem magam dap, Ausya ginwang ginjaw, n-tsa tsang kaw na KIC kaw na masing jahkrat rai na, Anhte uphkang dap kaw na bai rau ta gindun rai let hkai rem ni hte magam dap ni pawng hpawm na masing gran da sa wa ai re”
Ya aten naw ngam nga ai langu sun ni hpe mung 2021 ning langu hkai ai ladaw hpe hpang jahtum tawn nna dawm sana re hte dai shara ni hkan kaga hkai rem masing ni hpe matut galaw sa wa na re lam Laiza Ginwang Uphkang Du Salang Kaba Gawje Yaw San matut tsun ai.

“Anhte n-dai langu sun hte seng nna mungshawa hpe ma tsun nga dingyang re, n-dai hpe anhte gaw gau ngwi ngwi dawm mat wa n-htawm masing kaga galai na re ngu hpe anhte ding yang tsun da chyalu re majaw, 2021 ning kaw na gaw mai dawm ai daram dawm mat, shayawm mat wa na re hku re”
KIO Asuya gaw langu sun galaw ai lam hpe n-gun njaw, pat hkum wa ai hte Mungkan hta hkrit tsang ra ai COVID-19 ana zinli mung lani hte lani grau sawng wa nna Jarit tawt lai hpaga galaw ai Miwa langu lauban ni mung nmai shang rai langu hkai shadang mung laning hte laning yawm wa sai hta lai wa sai ten Laiza Ginwang grup ying kata Eka 2000 jan galaw sha ai kaw nna ya aten Eka 1391 sha nga sai lam chye lu ai.

Leave a Reply

Your email address will not be published. Required fields are marked *