Laiza Muklum Jawngma Ni A Hkum Gawng Shakyang Sharin Ginchyum Dat Lamang Galaw

Laiza muklum kata na jawngma ni a Gawng Shakayang Ginsup sharin lamang ginchyum dat hpawng hpe January (22)ya shani Laiza Muklum Lahta Tsang Jawng kaw, Jawngma ni hkum gawng shakyang ginsup madun hpawng lamang hte rau galaw ai re.
Hpaji sharin hkaja nga ai jawngma ni laika hpaji sha nrai, tinang a hkumhkrang hpe manu shadan chye nna makawp maga chye na matu hte hkumhkrang bawng ring hkamja zet let ai jawngma ni byin tai nna, wuhpung wuhpawng hte kanawn mazum madat mara chye ai ma ni byin tai wa na matu woi awn galaw ai lam Muklum Hpaji Du Saranum Kaba Lagang Ja Bu Jawngma ni hpe n-gun jaw ga tsun ai.
Hkum Gawng Shakyang ginsup sharin ai lam hpe Mung Seng Yang Sharin Shakyang Dap kaw na Sharin Sara ni sa du sharin ai hte dai ning na jawng lung ladaw hta shawng nnan lang woi awn galaw ai re. kadai mung kadai a jawng hta ndai gawng shakyang ginsup hpan hpe bai woi awn ginsup ai lam hpe galaw sa wa na re lam Laiza Lahta Tsang Jawng Up Saranum Kaba Singnyen Ja Mai tsun ai.
“Ndai ginsup lamang hpe anhte jawng ni hta mung aten masat nna ginsup ai lam hpe galaw sa wa na re, ndai sharin lamang hta nshang lawm ai kaga tsang gawk na jawngma ni hpe mung sharin ai lam galaw sa wa na re.ndai gaw shawng nnan lang re, du wa na jawng lung shaning ni hta mung galaw sa wa na re”nga nna tsun ai.
Jawngma ni a Gawng Shakayang Ginsup sharin lamang ginchyum dat hpawng lamang hta Laiza muklum ningtau uphkang du kaw nna mung Jawngma ni hpe sa du n gun jaw shatsam mungga jaw ai re.
Ndai Hkum Gawng Shakyang ginsup lamang hpe Muklum Jawng pati lakung kaw na woi awn galaw ai rai nna, muklum kata nga ai Laiza lahta tsang jawng, Laiza Lapran Tsang Jawng hte Sama Ginwang Sasana lahta tsang jawng ni sharin hkamla ai rai nna, lai wa sai January (11)ya shani kaw nna January (21)ya shani du hkra sharin achyin ya ai re lam chye lu ai.

Leave a Reply

Your email address will not be published. Required fields are marked *