ILAS Jawng Kaw Hpungtang Hpaji Madun Poi Galaw

Sinpraw ginwang Ginjaw, Laksan Mai Ja Yang Muklum kaw hpaw da ai Institute of Liberal Arts and Sciences (ILAS) jawng kaw January (22)hte (23) 2 ya Mai Ja Yang Mung Zup Gawk Nu kaw hpung tang hpaji madun poi galaw ai lamang hpe galaw nga sai re.
Gan Hkau de (In to the Space ) ngu ai gabaw hte hpung tang hpaji madun poi hta ILAS jawngma ni ginshatat da ai Project (50) jan hpe madun sa wa na re.
Ya na zawn Gan Hkau de (In to the Space ) ngu ai gabaw hte hpung tang hpaji madun poi galaw ai lam gaw wunpawng myu sha ni hpung tang hpaji hta hpang hkrat taw ai lam ni a majaw Wunpawng mungdan a Hpaji Gindai Mai Ja Yang Institute of Libaeral Arts and Sciences (ILAS ) jawng kaw rammma ni hpe Hpung tang hpaji sharin ya nga ai re hte wunpawng ramma ni nan Anhte lang nga ai Gunrai ni hpe Ginshalat galaw sa wa lu na matu yaw shada let galaw ai re lam Mai Ja Yang Institute of Libaeral Arts and Sciences (ILAS ) jawng na sharin saranum Lanyem Ja Ram tsun ai
Ganhkau De (In to the Space ) ngu ai hpung tang hpaji madun poi lamang hpe Wunpawng mungdan shanglawt hpyen dap, Dap Awn Daju Rung kaw nna madung Grum ya ai rai nna Kaga ra mara hpe Sipraw Ginwang Ginjaw Komiti kaw na garum ya ai re lam chye lu ai .
Lai wa sai 2019 ning hta mung hpung tang hpaji hte mungdan hpe gaw gap ga ngu ai gabaw hte galaw sai rai nna (2) lang ngu na hta gaw Gan Hkau De (In to The Space ) ngu ai gabaw hte bai galaw ai lam chye lu ai.
Mai Ja Yang Muklum kata kaw nga ai Dakkasu jawng ni yawng kaw Hpung tang hpaji sharin ai lam ni galaw na re hte hpung tang hpaji madun poi hpe mung bai matut galaw sa wa na rai nna, Mungkan shara shagu kaw nga ai Wunpawng ramma ni jawng ni kaw nna Kachin hpung tang hpaji madun poi ngu grau kaba ai hku nna galaw na matu mung hkyen lajang da ai lam chye lu ai.

Leave a Reply

Your email address will not be published. Required fields are marked *