KIA Masat (5) Dap Ba Ginra kata Myen Hpyen Dap hte KIA hpyen hpung ni gasat poi byin

KIA Masat (5) Dap Ba Ginra, Alaw Bum lawu kaw April (11) ya jahpawt hkying (8:30) aten daram kaw nna KIA hte Myen Hpyen Dap ni Gasat Poi byin ai lam na chye lu ai.

Myen Hpyen Dap ni, Alaw Bum lawu Tali Krung, Zaibru Hkyet de htu shadut lung wa ai majaw KIA pawnghpawm Hpyen Hpung ni hkap shingla gap gasat ai kaw nna gasat poi byin ai rai nna, gasat poi byin nga ai shara ni de, Numlang hte Myotit kaw dap jung nga ai Myen Hpyen Dap ni laknak kaba ni hte gap garum ai lam na chye lu ai.

Ndai Alaw Bum mayan kaw laiwa sai March 24 ya shani, KIA hte Myen Hpyen Dap ni gasat poi laja lana byin lai wa ai lam mung nga ai re.

Matut nna, Mungmyit Sinli Ga hte Jinghpaw Mung Ginra ni kaw, Myen Hpyen Dap hte KIA Hpyen Hpung ni lai wa sai Febuary shata kaw nna gasat poi bai byin hpang wa ai lam nga ai rai nna, Myen Hpyen Dap ni hku nna dai ginra ni hta hpyen shamu shamawt lam dingyang naw nga ai rai yang, gasat poi matut nna naw byin wa mai ai lam shawng lam lit nga salang ni tsun nga ma ai re.

Leave a Reply

Your email address will not be published. Required fields are marked *