Masat Yan (10) Nursing Diploma hte Midwife tsi jawng hpaw

Wunpawng Mungdan Shanglawt Asuya, Ginjaw Hkamja Dap kaw nna hpaw sharin ai Masat Yan (10) Nursing Diploma hte Midwife tsi jawng hpe June (8) ya shani Jahpawt (10:00) am aten hpaw hpang dat sai.

Nursing Diploma tsi jawngma marai (226), Midwife tsi jawngma marai (190) yawng marai (416) tup re nna, Kung kyang ai tsi sara/num ni law law paw pru wa na matu,buga hkamja bawng ring wa na matu hte mare buga na ramma ni hkamja magam bungli hta shang tsap gun hpai ai law wa na matu shalat ai lam re.

Lai wa sai shaning na hta jawng ma grau law ai majaw dum nta, jawng gawk, jawngma lang arung arai ni mayak nga ai, jawng hpaw hpang sai hte jawngma nnan n hkap la jat sai lam, Tsi Jawng Up Sarawun Sumdu Htu Lum tsun ai.

Jawng lung ladaw (2) ning masat da ai rai nna, pre class shata (2) hpe June (9) ya shani kaw nna sharin sa wa na re. Sharin ginhpan ni hku nna  Wunpawng amyusha ni chye ging chye mai ai Ninggawn Mungmasa, Rawt Malan Labau, Jinghpaw Laika Ka Htung Ka Lai, Htunghking hte Hpyen Htung Hkungga La Ra Lam hpe shawng sharin sa wa na. Daining kaw nna gaw Miwa Subject hpe mung bai jat sharin ya na. Ndai subject ni sharin ngut ai hpang she tsi hpaji  matut sharin sa wa na re lam Saranum tsun ai.

Tsi hpaji hpe Ginjaw Hkamja Dap na Tsi Sarawun ni hte shinggan na tsi machyoi ni sa du sharin ya na. Sharin sara yawng marai (30) daram hte sharin sa wa na re hte  daining na tsi jawngma ni hta Wunpawng amyusha ramma hpan hkum lawm ai lam chye lu ai.

Leave a Reply

Your email address will not be published. Required fields are marked *