Sadung Ginwang, Gaw Set Yang mare lahta Sadung hte Chihpwi lam kaw gasat poi byin

Wunpawng Mungdan Shanglawt Hpyen Dap Masat (5) Dap Ba, Masat (3) Dap Dung ginra, Sadung ginwang, Gaw Set Yang mare lahta Sadung hte Chihpwi lam numbraw kaw June (11) ya jahpawt hkying (7:00) aten daram kaw nna Myen hpyen gumshem dap hte Wunpawng Mungdan Shanglawt Hpyen Hpung ni gasat poi byin ai lam chye lu ai.

Gasat poi byin ai majaw Myen hpyen gumshem dap ni gaw makau grup yin de laknak kaji kaba gap shadam ai lam ni nga ai. Mungshawa hkra hkala hkrum ai lam nga nnga hpe gaw sagawn nga ding yang re. N-dai shara kaw sha lai wa sai April shata laman hta mung kalang gasat poi byin lai wa sai re lam chye lu ai.

Jinghpaw mung, lahta sammung Mung Myit Sinli ginra ni hta Myen hpyen gumshem dap ni kawn Wunpawng Mungdan Shanglawt Hpyen Hpung ni nga ai ginra de htu shadut lung wa ding-yang naw re ai majaw Wunpawng Mungdan Shanglawt Hpyen Hpung ni hte gasat poi ding yang naw byin nga ai re.

Lai wa sai June (10) ya shana de mung Hka Ya Bum mayan hkan shamu shamawt hkawm ai Myen hpyen gumshem dap ni hpe Wunpawng Mungdan Shanglawt Hpyen Hpung ni hkap shingla gasat ai lam nga ai lam chye lu ai.

 

Leave a Reply

Your email address will not be published.