Wunpawng Ginra Kata Na Gasat Gala Shiga

Wunpawng Mungdan Shanglawt Hpyen Dap Masat (5) Dap Ba, Masat (19) Dap Dung ginra, Dawhpum Yang lam kaw June (18) ya jahpawt hkying (6:00) aten daram kaw nna Myen hpyen gumshem dap ni hte Wunpawng mungdan shanglawt hpyen hpung ni gasat poi byin ai lam na chye lu ai.

Manmaw maga de nna hpyen n-gun, hpyen lang arung arai, lu sha ni htaw lung wa ai Myen Hpyen Gumshem Dap ni hpe Wunpawng mungdan shanglawt hpyen hpung ni hkap shingla gasat ai kawn gasat poi byin wa ai re .

June (18) ya jahpawt hkying (10:10) aten daram hta mung Num Lang lahta Machyang Hkyawng kaw lai wa ai Myen hpyen gumshem dap ni hpe Wunpawng mungdan shanglawt hpyen hpung ni bawm hte hkap shingla gasat ai lam nga ai, Hkying (11:30) aten daram hta Laja Yang hte Na Lung lapran kaw hpyen modo hte shamu shamawt lung wa ai Myen hpyen gumshem hpung ni hpe hkap shing la gasat ai lam mung nga ai.

Myen hpyen gumshem dap ni gaw lai wa sai 2/3 ya kaw nna Daw Hpum Yang, Num Lang, Laja Yang mayan hkan shim lam la nna shamu shamawt ai lam, hpyen n-gun htaw shalai ai lam ni matut manoi galaw nga ai re lam shawng lam lit nga salang ni kaw na chye lu ai.

Jinghpaw mung, Lahta sammung ginra nkau hta Myen hpyen gumshem dap ni hpyen n-gun jat bang nna shamu shamawt ai lam, rung rai hte malu masha htaw shalai la ai lam ni ding yang naw galaw nga ai majaw gasat poi gaw matut nna naw byin wa mai ai lam shawng lam na lit nga ai salang ni maram da ma ai.

 

Leave a Reply

Your email address will not be published. Required fields are marked *