Laiza Muklum Kata De Shinggan Masha N Shang Hkra Tsep Kawp Pat Hkum

Jinghpaw mung kata COVID -19 ana kap hkrum ai masha lani hte lani grau law jat wa ai majaw ginjaw ginra kata de shang wa ai shinggan masha ni hpe tsep kawp n shalai pat hkum kau sai lam Nam San Pa kun rai htinglet dabang up Du Labya Hka Li tsun ai kaw na chye lu ai.

Anhte makau grup yin ni hta ana kap hkrum ai masha lani hte lani law wa ai majaw ginjaw ginra kata de shang wa ai shinggan masha ni hpe n shalai na matu Ginjaw COVID-19 Ana Zinli Makawp Ninghkap Komiti kaw nna matsun da ai hte maren shinggan masha ni hpe tsep kawp n shalai ai sha n-ga kun rai ni hpe tsi gat nna she muklum kata shalai bang ai lam galaw ai hpe Du wa matut tsun ai.

Maisak Pa  Quarantine Dabang shagyit hta mung shinggan masha ni lagu shang ai zawn re n nga hkra dabang kata volunteer ramma ni, magam gun ni hte pawng hpawm mungshawa hpyen hpung ni shani shagu masat da ai shagyit ni hte lagu shang mai ai shara ni hkan duty hkap ai lam ni ding-yang galaw nga ai re,  lagu shang wa ai mungshawa ni hte magam gun kadai hpe raitim ja ja ahkyak la ai lam ni galaw sa wa na re lam mung chye lu ai.

Yi, sun sa ai mungshawa ni hpe muklum rung kaw nna masat da ai lakmat lawm ai rai yang shalai ai lam nga ai raitim Muklum kata de bai shang wa ai shaloi masat da ai Quarantine dabang hta hkamja lam masam maram hkamla shangun ai lam galaw nhtawm dum nta de bai wa shangun ai lam ni galaw ai re, hkamja lam masam maram hkamla shangun ai hta ana makawp maga tsi htu lakmat lu ai ni hpe nhtoi (5) ya masat ai hte ana makawp maga tsi htu lakmat n lu ai ni hpe nhtoi (14) ya masat nhtawm Quarantin hkamla shangun ai re lam Maisak Pa Check-Point Ningbaw Salang Kaba Hpakawn Seng Li tsun ai.

Ya aten Maisak Pa Quarantine Dabang hta lai sai ten lam n pat shi a laman du shang wa nna hkamja lam masam maram hkamla nga ai mungshawa ni marai (76) nga ai re hte malu masha hpe Ginjaw COVID-19 Ana Zinli Makawp Ninghkap Komiti kaw nna lam masan ai kata Asuya kaw nna garum jaw ai re hpe mung chye lu ai.

Munglai Hkyet shagyin hta mung jahkring jahkra Maisak Pa hte Muklum lapran hkawm sa hkawm wa galaw ai ni hpe ana makawp maga tsi htu lakmat n lawm ai ni hpe n shalai ai sha bai nhtang wa shangun ai lam ni mung galaw nga ai re lam chye lu ai.

Ya na zawn shagyit shagu hta hkawm sa hkawm wa galaw ai ni hpe jep chyoi ai lam galaw nga ai hte shinggan masha ni Muklum kata de n shang lu hkra pat hkum da ai hte maren kun rai htinglet dabang ni hta hkawm sa hkawm wa galaw ai mungshawa ni kadai n nga ai lam mung mu chye lu ai.

Leave a Reply

Your email address will not be published. Required fields are marked *