Tswm La Ai “Ing Raw”

Moi shawng de grai hkikhkam nna kaba ai mare langai mi nga ai. Dai mare gaw, Ginnem mare nan rai nga ai. Dai mare a madu gaw, Ginnem Du kaba, Mung Myit Wa Laksa ngu ai wa rai nga ai. Dai Du wa gaw , hpraw nsam nachying tsawm la ai, shayi Ing Raw ngu ai mi lu da wu ai. Ginnem Du kaba wa a nta gaw, dap shi jinghku  waw nna, grai galu nga ai. Shade mi hkikhkam la ai re majaw, dai nta hpe “Htingnu” ngu shamying da mu ai. Htingnu dai gaw, Ing Raw a hpraw nsam htoi gala ai majaw ,  wan shatu pyi n ra hkra rai nga ai. Dai rai nna, Ginnem Ing Raw a tsawm la ai hpraw wunlang a lam hpe, Jinghku masha ni daini du hkra shagawp sha-a ai gaw;- “ Hpraw wunlang jung, Shi jahku dap htingnu hkung: maling kata na salwi si zawn dan, Hpraw san shata aman man; Zaunyi amyi myi, U pra  di ahpyi hpyi; Uri shabyi zawn san, Nhtoi gintawng daram dan; Shi gaw, Ningju pat neng hte pai hkra shabyi nat, Latsa chywi gali hte awn yawn sinda gayat; Shi hpe mu yu ai ni yawng hkra, Kraw wang sindung htep gara; Hkrutum hkingdang loi sha mi shakra; Myi hprap zawn gala ai jan” ngu tsun shagrau da mu ai.

Dai  re ai majaw, Ginnem mare gaw, lai sa lai wa manam ni yawng hkring, ja len hpaga hting, kata wan wut wan “a”, ning-ip shiga bra ai mare rai nga ai.

Bai lam mi hku tsun ga nga yang, Ing Raw hpe mu yu sai wa kadai raitim, minla noi jung mat mat rai nna, yup tim yupmang mang, sha tim shat dang dang, nsa shaw tim, sahka hkrai gamang, rai shajang nga ma ai.

Shade de, tsawm la ai jan rai nga ai majaw, Kadai mung shi a lam hpe n tsun, n kajai ai n nga lu ma ai. Dai Zawn Kajai gara ai shiga mung, mungdan shara shagu shingjut shingnaw hkan mawng she mawng, gumhkawng she gumhkawng hkra, chyam bra mat wa sai.

Ing Raw Hpyi Manam

Ginnen Ing Raw a tsawm la ai hpraw nsam kajai ai satang shiga gaw, Sinpraw Sinna Dingdung Dingda, ni ai, tsan ai n nga, bra chyam wa sai. Shiga dai, na ai ni mahkra mung, “Mu mayu ai mahtang, sha mayu ai hta grau ai,” nga ai ga malai hte  maren, mungdan shagu de na hkawhkam kasha, sahti hpaga la ni mahkra, sa hpyi la mayu ai hkrai rai shajang wa masai.

Ya lana de mi hta, Ing Raw hpe sa hpyi na matu dama la marai manga ting, kalang ta, sa zup shajang mara ai. Dai ni gaw;

Langai ngu na bau ju pyi shi jahku ting tu hkra re ai bausa gun Shadung Wawnghkye Du wa, Wangdi Chyau hpa.

Lahkawng ngu na wa, magyen yan bu chyang labu gun ai Lamu Htun La wa, dai wa gun ai magyen yan bujang mung, hpyan dat yang, shi jahku dap htingnu hkrang: katsu nna shawn dat yang, na pyen hku e hprang, re ai mauhpa bu chyang labu rai nga ai.

Masum ngu na, ja katsing jet jet joi mi tup gun ai, ja tsing dup ai soi garoi, Da Dan Zau Doi ngu ai wa. ja katsing jet jet joi mot up gun ai, ja tsing dup ai soi garoi, Da Dan Zau Doi ngu ai wa.

Mali ngu na, shinglim Sep Zau Krim Uma Hpungdim ngu ai wa mung, Dung dat yang, sumdun lahpyen tup, hpyan nna shadawn yu yang, hkun hkam dawnu grup  hkra, re ai “Htawngwang” ngu ai hkachyi gaili mi gun sa wu ai.

Manga ngu na wa gaw, Ja Tawng Naw Mazut, hkuba garang lunghkrut ngu ai wa rai nga ai, Ndai dama la marai manga  hpe Ginnem Dukaba, mungdan myit jasat ai Laksa gaw, chyalai namchyim  hte  hpring ai, wa hkrang salu hpe, hkap jen, rim la ai, tsa lauhku hte  hkalum la nu ai. Dai shani na, wa hkrang salu hkap jen rim la ai, tsa lauhku hpe mung, ya du hkra ndai zawn shalai tsun chye nga ma ai.

“Wa awng dumbung hta  bang ,

Nbang gawk tep kaw shingdang;

Baw hpang jut de shanat,

Ndi gram dingla ni sat;

Sumbwi tsang pawng hte laden,

Shinglap yubawn e byen;

Hpaw dat yang sama wai,

Ningji seng Galang pyi kahti ai;

Hprep di dat yang,

Ya ma tsing pyi si,

Garap sin shalip pyi mani;

Kalamg mawm di yang,

Hpara sum ten htun,

Lahkawng lang mawm di yang,

Myi hpyi summwi kun;

Masum lang mawm di dat yang,

Myi hpyi hkindang kawm,

Shayawt ninghka tawm re ai,”

Ngu tsun kajai da ma ai.

Ginnem Du wa gaw,chyaru tsa gama garan jaw ai shaloi, kaga dama la marai mali hpe singkai tu,maichyu kawk hte  dat bang jaw ai rai tim, Ja Tawng Kumnu, dan lungseng hkyu hpe rai jang gaw, wara dumbung hta bang jaw wu ai. Dai zawn shanhte hpe hkalum la ai aten hta, Ginnem Du wa gaw, sa du ai dama la matai manga hpe shanhte gun sa ai, hpu ja rang ni a lam san yu wu yang, shahte mung langai hte langai kabu gara rai let, tinang a ja hpaga ni shaw madun nhtawm, “Ing Raw shayi sha gaw, nang tsa Ginnem Du way u tsaw ai wa hpe me ya mi”,nga ma ai. Shaloi Ginnem Du kaba, mungdan sat ai Laksa de nna tsun htang wu ai gaw:-

“Hkri Zau Sinwa dama la kaja hte e, nanhte yawng, Du ngu yang mung, Du hkrai, Jan ngu yang mung , Jan hkrai, hti-tang, jawng kangai hkrai rai myit dai. Ngai de nna gaw, nye a dama la majing hpe n ginhka lata ya lu ai. Le! Ing Raw shayi, shi nan she lata u ga. Dai re ai majaw,le! Ing Raw shayi a nga shara Ja Hkawn Pinla Dap de nanhte hkum nan sa du, myiman chyaw chyaw tsun yu mannu,” ngu dat mu ai.

Dama la marai manga hte mung, latsa Ginnem Du kaba, mung lam sat sha ai jauya wa tsun madun ai mungga hpe na ra ai hte htaphtuk dum manu ai.

Ing Raw Jan a Ja Hkawn Pinla

           Dama la marai manga hpe “le, Ing Raw a ningdun yupra de sa nna, shada myi man tut chyaw rai yu masit”, ngu tsun ai Ginnem Du wa a ga hpe, laswi lasa sau pyi byawng hkra, na ra sharawn da mu ai rai nna, langai hte langai, Ing Raw a Pinla dap de, sa du mayu ai gaw, masha sama manam hkrup ai, wawt yam zawn rai hkra she gama mat shajang masai. Kaning rai nme law nga yang, dai satang shiga mawng gumhkawng la ai, Ing Raw hpe kadai mung, kadai shawng, mu hkrum mayu ai myit gaw, gasit katu bu nga malu ai.

Rai tim, Ing Raw jan hpe hkrum na matu gaw, shanhte myit ai daram nloi nga ai. Hpa rai nga yang, Ing Raw shayi ja dingsi gaw, shi a salung  sala hkawn jet manang matsat tsa ni hte hkrai, tut e, ginrun nga ai jan, rai nga ai.Shanhte shanu nga ai shara gaw, dap sumshi waw, hkuwawt sumshi hpaw ai rai nna, baren sumla singgaw ai manghkam labu matu ni shada kasawt sut-sat nna, na lawn hpungtang wu kadu ai gaw, na lashing she gara, kara jaw hpawng pyi shanut na zawn, nga ai rai.

Wawnghkye Chyauhpa hte Ja Hkawn Pinla

Shing re ai a majaw, Ing Raw gaw gara gawk kaw mahtang yup ai kun? Chye sagawn la na matu, grai yak mat nga manu ai.Dai zawn myit yak nna, kaga manang ni gaw, shada naw mada yu, sawn sumru bu nga ai aten hta,Shadung Wawnghkye la wa gaw, Ing Raw hpe, ngai shawng lu jahkrum,shawang amyit shawng lu hkindun lu n-ga nga,  nhka hkalum, n-gup chyum rai hkra rai nna, shawng rawt sa wa nu ai.Pinla dap de sha naw, lagyim marim asoi agyoi yu rau yang, manen hkumpup hpe kabye kaprau, ngahkyi sumpum hta kashawt galau, mat nu ai.Wawnghkye la wa, galau ai shingra kanawn ai majaw, kawn tawn ai, sau mawn usu nu kajawng, ruk rak ai hpe, ginhkyeng(ningkyeng) sharaw htim ai shadu nna, mare na chyaulang shabrang ni hpu sa wa mara ai. Dai Wawnghkye la wa gaw, Ing Raw a ningdun yup-ra mi n mu, ningsang gaya mi chyawm lu, nga utang hkyi sha mu magra, ningsang gaya kaba sha mu hta, sutang hkyi sumpum hte sha rau ginshum, shadang wunyaw myiman sum nna, lahkawng htap nba hpun let, wa htinggrum taw nga mat nu ai.

 

Lamu Htum La Wa hte Ja Hkawn Pinla

Lamu Htum la wa mung, dai lam hpe n chye ai majaw, kadai mung garai n sa yang, ngai shawng n-ga nga, lawhpa myit kaba hte chyahpung lam hku garet wa ai hpe, ntawt sin gwi la e, makret kawa dat ai hkrum nu ai. Shing rai, gwi tuk lung nna myi man du hkra bum, gaya kaba hkrum ai hte, kanu da ya dat ai nba hpun sha htinggrum kau nna, wa yup galaw taw nga mat sai rai.

Da Dan Zau Doi hte Ja Hkawn Pinla

Dai hpang e Da Dan Zau Doi gaw, kaga manang ni hpe, mada yu jahproi nna, yawng hkum nga ai hpe mu jang, htat chyang nsin kata hta masawp lamawm let, Ing Raw hpang de naw, hkawm sa na nga rawt sa wa yang, laring gumra hpum taw nga ai hpe, machyu lunghkrung zawn nawn nna, magra jum dat ai nga yang, laring gumra e rawt lahkat, wangling kaduk de me hkrat bang wa nu ai, Dai rai nna JaTsing dup ai soi garai, Da Dan Zau Doi wa mung, kahtan kaw tauba si daram bawng, katsa wa a nta de na shi a gun rai ni hpe pyi n hta la ai mayun hprawng mat wa sai rai.

Shinglim Sep Zau Krim hte Ja Hkawn Pinla

        Dai hpang Shinglim Sep Zau Krim Uma Hpungdim ngu ai wa gaw, shi a myit kraw azai hte myit sawn sumru yu nna, manang ni, langai hpang langai, Ing Raw a shara de, lagu marim lagyim sa ai lam ni hpe, chye la kau nu ai. Shingrai shi gaw, ya, hkau Zau masum masha dawhpum hte mahkra mung, Ing Raw jan hte pungding hpoiwan n rum, ningsang gaya hkrai she hkrum masai. Dai zawn byin ai lam ni mahkra mung, ngai kajai Zau Krim, Uma Hpungdim a, Gying kam, hpung shingkang majaw, byin ai nan rai sai, ngu, sawn la nhtawm, rawt galai sa wa sai.

Ya, ulat hpunggam goi,  rum hpang nhtoi nnan htoi ai ten e, Wo! Ginnem Ing Raw Jan a, ja hkawn pinla de du nna, hkuwawt chyinghka ni hpe masem yu dat ai nga yang, lagaw kabye na shara maga de atsawm sha, yu na, n dum kau wu ai majaw, pinla dap langai mi a hkuwawt yang na, jit hkang htingre la-ing de, kashawt bang mat wa nu ai.

Shing rai, di hkrat bang ai htingre la-ing hta, du lim hkra, lup taw nga ai hpe, Ginnem shayi ni sa mu, Ing Raw hpang de, ntsawm shiga du na hpe tsang, ntawt sin, gwi la, hkap amya na mung myit mang, mare de na chyaulang shabrang ni, rim magra  ahkre na hpe mung hkrit tsang ai majaw, shi hta rawng ai n-gun lapyin mahkra hte htingre, jit la – ing kaw na, tsam mari mahkyit mahkat noi  pru wa sai. Shinggan de du nna, shi a hkum hpe yu yu wu yang, yu chyayat nsam sam, jit hkang manam ai gaw, ladi nchyun daw na daram, rai mat nu ai. Dai maajaw, shi a manam shara, Ginnem Du kaba a rung, dawdap de nhtang shang wa na gaw, kachyi pyi n gwi mat nu ai rai nna, kalang ta, maling numran hpe tawk gala let, shi a buga de hprang rai wa mat sai rai.

Ja Tawng Naw Mazut hte Ja HKawn Pinla

Yah hpang jahtum dama magum, Ja Tawng kumnu, dan lungseng kyu, mazut hpri tawng matu, chyawm me gaw, lahpaw tingrawng sha hta lang, taiyu shinggyin ni hpe, nhpe hta htawm bang rai nna, sumwum sumwaw hkan wam, htingra kaiset ula tam, likngang brang lawn ni hte jahku, layung makyit hpyau di nna, shabrang ma ni hpe, u numji numjoi ni gap jaw di nna, Ginnem Ing Raw shayi ningbaw a lam hpe, shi hte hkau chyap sai likngang brang ram ni tsun dan mu ai gaw:-

“Hkau e….! Anhte a Ginnem shayi ja dingsi gaw, Jaugawng latsa madoi n up ai u gan, Lamu ganghkau e pu tu ai nampan, pai hkra shabyi hpe ningju pat neng hte nat ai jan: Shingdu aman mada yu yang, hpraw wunlang hkung, Jan htan shingna jung ai; Ginnem Du ni a shi jahku dap htingnu ting, Wan shit shaman n shachyi ninglen hkung, Ninggawn shawa a myit minla jung ai jan rai nga ai law! “ngu tsun dan mu ai,

Dai jan gaw:-“Worapinla  dap sumshi waw, Hkuwawt sumshi hpaw ai hta  na lawu e hprau, lahkawng numdawn hkrau re ai kaw, Moi pra jan moi wai, Shanu nut gungai hte rau,`shawang amyit kaprau, Lai ri latung kangau nna nga nga ai,’ngu nhtawm, sumwum kata nna azi, la hkra yung tai hte madi let, tsun madum dat manu ai.

Ing Raw Jan A Ja Hkawn Pinla Dap De

Ja Tawng Naw Gumhkawng, lamu hpan Alawng mung, likngang brang ni matsun dat ai hpe, ai sha di matsing la nhtawm, hpang shani na shana, zahka shat sha ma ai aten hta, Ginnem Ing Raw a shara, ja hkawn pinla de, baren myi tai hte azi, gap dat ai pala zawn, hkre di, rai sa wa nu ai.

Ja Tawng Naw Gumhkawng, lamu hpan Alawng, du shang wa jang, prat wai gumgai jan kajawng ai gaw, shi a lai ri jit na (Zinna ) she htawng hkra, rai wa sai. Dai hpe Ing Raw gaw, yungwi nsen hte yat sha bum, shabyi htep di nna tsun wu yang, se re mani sai, kaga dun ran hkrai, rai mat wa sai.

Ya Ginnem Ing Raw shayi ningbaw jan gaw, Ja Tawng Naw hpe hkanghkyi sumla dambang, ‘baren baw sumshi dingzang, ‘re madang pa, “panep,” shaw nna hpyan, nbang maga de san, di nna shadun nu ai. Dai hpang baw nhtung maga de bai yawn, jet raw chyaru lauhku dumbung hpe krawn, ngatsang shan jahkraw hte rau yep di, shadun jaw let, hkap hkalum hkungga la wu ai.

Shingdi, hkap hkalum shachyen la ai hpang, shan hkrai sha wunyaw aman hkrum, se re mani sum re ai aten hta, Ginnem Ing Raw shayi ningbaw gaw, nhtung gawk kaw na, wara dumbung ni hpe malaw, buk ginshang hpaw, kawa chyen pau ke manaw jaw, larung sumpyi  ni jahkum nna shun, masum hkam ep-ya hpaw madun, binlang shaji ni hte lagra, pan-yawn pan-tsun ni hte mawn shakya di  nu ai. Shaloi Ja Tawng Naw gaw, Ginnem Ing Raw hpe,

“E Rat e! ngai gaw nang Rat jan hpe u gaw e magan hpun tingra madoi, yubyi tangraw e kadung hpumkraw mangoi: sumwum jahku din ai kaw na kataw tawji a ma-u mu, hka hpunggaw jahku din ai kaw na ngahpyin ngalai yu, di mada let,danam sing ndan zawn shading ti, sa du ring ngai re. Nang hpe nan kaja tsawra dik nna sa du ai rai nngai,” ngu wu yang Ing Raw gaw:-

“E Rat e! ngai gaw, kahtan singkung ru hkum mi hte, shingnoi noiji jahku lu shatai, madang pa chyen mi hte chyahtai htai yawng jahku lu shatai ai wa kaw sha n rai yang gaw, n wa na ngu ai jan rai nngai,” ngu htan nu ai.

Shaloi Ja Tawng Naw mung, “O Rat e! Tinang myit tawn ai lam me chyawm gaw, ngai mung, mali zaini chywi nna du grup, summwi hpe lahkawn nna du grup, summwi hpe lahkawn nna dang hpang tup, di lu ai jan hpe sha n rai yang gaw, n la na ngu ai nrat Zau san tsang, sau wan kalang kang rai nngai. Rai tim, nang Ginnem Ing Raw, shayi ningbaw a ningtsing hpraw htap, ri da maka kap, lailen akyang kaja, tsun na mara mi n mu ya re ai satang shiga hpe lu la ai majaw, htaw! Anhte a Nawng E Hku Shadung, mungkan a marung, ninghkawng tsi wa tu, myit ai sumhpa lu ai ga de, woi la nna, chyinghkai nu a malai shatai ti, tawn da na matu sa du ring ngai re,” ngu bai htan tsun dat wu ai.

Matut nna, “ Ya hte hpawa tup, nwa Ginnem Du Kaba a rung dun dawdap kaw sa nga nhtawm, gun nawn sa ai shayi hpu ja ni hpe mung jaw ya da sai. Nang hpe hpyi na matu sa ai mung ngai hkrai sha n rai; kaga manam mali mung nga nga ma ai. Anhte yawng hpe tsa Ginnem Du wa, mungdan hpran ai laka gaw, jet raw lauhku tsa hte hkalum la, n-gaw nwai mung hte tsun ya mi ai gaw, sau mawn wa la shan hpe sha la, jet raw lauhku lu da rai nhtawm, le! Ing Raw a shara, ja hkawn pinla de sa wa masu: ngai gaw, nanhte hkri Zau Sinwa, dama la marai manga hta na, dama la majing hpe n lu lata ya ai. Dai majaw, Ing Raw shayi ningbaw jan, htoi tsawm ninghkaw shi nan she, lata ginhka la lu myit ga, ngu dat dat mi ai,” ngu wu ai.

Matut tsun jat ai hta  “Shingrai tsa Ginnem Du Kaba a mungga lu la ai hpang, hkau Zau marai mali, masha chyasi ni gaw, nang Ginnem Ing Raw a ningdun yup-ra, sa tam masem ai nga yang, nga hkyi sumpum kabye galau ai ni galau, jit hkang htingre la-ing hta hkrat dau ai ni dau, laring gumra e lahkat ai ni lahkat, ntawt sin gwi la  kawa makret dat ai ni makret dat rai nna, wunyaw aman sum, ningsang gaya kaba hkrum let, wa mat shajang masai. Dai rai nna, nang Rat Ing Raw a shingnip shingna pyi n mu mada ai ningsang gaya hta, seng dek n-gang gra, rai nna wa mat ai ni wa mat, yup-ra kaw nba htinggrum pyi, n hpaw gwi ai taw nga ai ni gaw taw, rai masai.

“Ngai chyawm me gaw, nang Ing Raw hte nan, Hpan Wa Sagya e san, laju punghkum ka kawan hkrum singngai. Dai rai nna, ngai hpe gaw, Ja  Tawng   Naw, nang hpe gaw: Ginnem Ing Raw ngu, shingteng amying du teng, jahkrum da mani ai re, brang  lawm ni e jau, layung makyit hpyau rai nna hkan sa ai hte nang kaw myiman chyaw rai sa du wa ring ngai.

“Dai re majaw, ya nang  Ginnem Ing Raw shayi ningbaw, Ginnem shayi, ja tsing dup ai dingsi gaw, anhte a Ja Tawng Lau-ngun de mada, Nawng E Hku shading de she lau wa saga. Wo wo! htaw htaw! Hkum tsun shanut, na a sindung kraw wang hpe lau she jahkut, shayi amyit hpe lawan dan, makyit gamung lawan she hpyan sanit. Ngai Ja Tawng Naw Gumhkawng, lamu hpan ai Alawng ri gaw, puhkram la ahpyi hpyi, tsaugawng u amyi myi, ahpraw ningja pru, sinda mun kaja tu ai wa rai nna, hkum hpe yu tim kam mai, azai nyan mung sam ai wa rai nngai,” ngu wu yang, dai lam ni mahkra hpe myit kraw hta sawn sumru myet kraw hta sawn sumru yu ngut chyalu rai nga sai, Ginnem Ing Raw mung, shayi myit kaga mi n shanut, kraw sindung hkut sai hte maren, shinggan myi sha mun, di nna sindung gadi ap-in shun, di dat sanu ai.

Shinggan myi sha mun, di ai kumla hpe chyoi chye tak hkawn tawn ai Ja Tawng Naw Ningsin sharaw mung,

“Shaloi gaw, Rat Raw e! ya ulat hpunggan goi kri, Lainawng dung hpunntsin hpyi, wa gawn salang ni, tinang yup-ra de shang, kru majan a maitsan htang re ai aten hta, nang Ginnem shayi, jamwi pu noi ai dingsi mung, na a shayi dunra nna pru, ngai mung htaw! Tsa Ginnem Du kaba a rung dun, dawdap kaw na pru, an lahkawng shawang amyit zinlum, kraw wang mungga hkrum rai let, ndai yu dung gunra kaw nna rawt, htaw! Anhte a Nawng E Hku shading, kaba bunlung de htawt wa saga i?” ngu wu yang, Ing Raw jan myi lu sha mun, kraw kadi shun di nu ai. Dai kaw nna shan gaw, shada myi lu chyai, sindung kraw kadi lai, yung tut layung hkai rai masai.

Ginnem Shayi Woi La Ai Lam

Yaaa Ja Tawng Gumhkawng lamu Hpan ai Alawng gaw, Ginnem Du laba shayi, mungkan na ai daingsi kaw na mungga gadi lu la, n prai mai nam-ya chya ngut ai hpang, manam yup ginra,dawdap kaba de na, shi a buhpun nba nhpye n-ga danhkung danna mahkra hpe, wa la nhtawm, chyahpung lam maga de pru nna Ing Raw jan hpe, la taw nga sai.

Ja Tawng Naw pru, la nga ai kade nna yang, ningsang gadi du, ulat hpunggam goi garu, dingdung maga de na lainawng hpungtsin su, nga nna bung wa ra ai.Ginnem Ing Taw mung, shayi ningdun kaw na rawt na matu, buhpun nba, lai ri jitna, jaw hpawng kata du hkra, hta sumpum nhtawm, shi a buk ginshang kaw bang nna hkyawm di wu ai. Dai hpang, pru na chyinghka maga de nawt, asat lagaw htawt sanu ai.

Sing rai hkuwawt chyinghka hpe yawhti ningwawt matu hte sap nna ap, hkum chyen mi sha dap naw, di wu yang, Ginnem Ing Raw, jamwi pu mawng , shayi ningbaw a tsawm la ai shayi shingna gaw, makau kaw na, mamdum a, shakum hta kap rai, dan dawng pru wa ra ai. Dai zawn dap pru kap ai shayi shingna hpraw wunlang hpe, Ja Tawng Naw gaw, Ing Raw nan rai sai ngu, rawt ahpum dat wu nga yang,shaprai dat hkra di, gap tawn ai, mam dum sumshi ting wa, grum rai, daw taw mat salu ai.Dai zawn, mam dum sumshi she daw hkra rai, gamu ahpum kri taw nga ai, Ja Tawng Naw hpe, Ing Raw mu wu yang,

“E! Rat Zau Mazut, hkauba garang ai lunghkrut, Rat Zau Gun hkawng, ningsin sat hkawm ai sharaw e, shayi gadi galoi n shai, nam-yu maka galoi n shaprai; nang Rat hta lai, kadai kaw mung, htawt wa na ni ai  n rai, shadang ninggun ja madun gaw n ra na sai,” ngu wu ai.

Shaloi Ja Tawng Naw gaw, nsen ngoi pru ai maga de man galau, Ing Taw hpe lapai hpajawk kaw hta hpai nna hkrau, Ginnem du a jahku dawng du hkra di, kum da ai wangling kaduk hpe, shingtawt gale nhtawm, le! Numshang yang kaw tu ai kadung hpun hpe mung, dumhpyawt di nna, Ing Raw hpe hprawn, woi hprawng wa sanu ai. Shing rai Ja Tawng Naw hte Ginnem Ing Raw yan gaw, namtsing jahtung maling hpe, tawk ashep nna, Nawng E Hku shawa, Ja Tawng nga shara, ma-un tu htingra de,du wa masai.

Ginnem Ing Raw Hpe Hkalum La Ai Lam

Ya Nawng E Hku Shadung hta nga, Ja Tawng mare masha ningtung ningba ji nban mahkra gaw, “ Ja Tawng Naw Gumhkawng, mazut hpri tawng e, Ginnem shayi, ja dingsi, Ing Raw majan, nanglung du jan hpe, woi hprawn nna, du wa ra ai”nga, tsun gara ai shiga hpe, na lu jang, lawu lahta nta shagu kaw na , htingbu htingpyen ni kabu gara ket, sa hpu yu ai ni gaw, ningrim ulun  wa ai u ni zawn rai, she kahpru shajang mara ai.

Dai num nnan sa hpu yu ai ni gaw, chyaru, tsa , u, udi, shan, nga, re ai ni mung, gun sa ma ai rai nna, chyahpung maga de na, hpun tawn shara ting, dai rai ni hte ,  hpring dem rai, mat malu ai. Ja Tawng Naw Gumhkawng, lam hpan Alawng mung, kawoi dwi Gintawng jan Bannang hpe jaw jau let, Ginnem Ing Raw hpe hkungran la nu ai. Dai shaloi chyai ai ga gaw, ning nga nga ai;

“ Kawoi dwi Gintawng jan Banang hpe jaw jau, Shayi maraw hpe shanang e raw kau, Hkawn jet apart shawai, Lap galu kumba shalai, Hkang dup ri tik lang, Lapli kumba hpai, Nsam prawn bunghkaw pai, Ja shawng jan kamoi ba e shaman gaihpu chya, Mayat sinya wa, U Gaw Hkungrang tsip gaw, N prai mai nam-ya jaw, Num ningnan lahkum hte hkap, Shi bye htai-yawng kaw shatsap; Ngahpyin ngalai ujat lun, Shinggyim magam gun, Shingteng amying wundup, Wangdi shawun chywi nan wun-up, Kagu karat kamoi kana, Kashu kahkri ni hte shachyen ya, Num nnan hpa jaw nna ren,” nga ai ga ni rai nga ai.

Dai shani kaw nna Ginnem Ing Raw shayi ningbaw gaw, Ja Tawng Jan tai, shingteng amying galai nu ai rai.

 

Sara  Hkyen  Nang

Leave a Reply

Your email address will not be published.