Laiza Muklum Kata Hkali Byin Shadang Law Jat Wa

Laiza muklum kata hkali ana byin hkrum ai masha shawoi shaning na hta grau law jat wa ai majaw Hkali ana makawp maga ai lam hpe Muklum kata nga mungshawa ni yawng hkan nang hkan sa na matu Laiza Muklum Hkamja Rung kaw nna ndau shana da ai  hpe chye lu ai.

 

Muklum kata  laban bat mi laman marai 10 jan hkali byin hkrum nga ai majaw
lai wa sai shaning na hta hkali Byin shadang htam lahkawng jan law jat wa ai masa re nga, Muklum Hkamja Rung kaw nna maram da ma ai.

Ya aten COVID-19 ana zinli mung makawp ninghkap ra ai hte maren, Hkali ana hpe mung makawp ninghkap ra ai ten rai nga ai. Dai re majaw, mungshawa yawng gaw tinang hkum dinghkrai hkamja nga lu na matu Ji grawng n kawa hkrum hkra sadi sahka nga ga nga nna, Muklum Hkamja Rung lit nga Sarawun ya na zawn tsun ai.

“Hkamja lam ngu ai gaw woi awn ai ni kade mi woi awn tim, tinang dinghkrai hkan sa lam nnga yang gaw ana zinli ninghkap lu nala nnga ai re majaw nang ngai yawng hta lit nga ai ngu hkamla hkan sa na matu htet shana mayu ai law”

Hkali ana makawp ninghkap lu na matu tinang uphkang ginra mare buga shagu hta ningmu jahpaw hkaw tsun ai lam, Tsi Tsing Sut garan ai lam, Tsi gat ai lam ni galaw nga ding yang kaw daining gaw lai wa sai shaning na hta hkali byin shadang bai law jat wa ai re nga nna mung Ginjaw Hkamja dap, Hkali makan Dap ni tsun ai.

 

Muklum kata Tsi gat ai lam hpe lanam shang wa ai ten hta kalang gat ngut sai raitim, Hkali ana kap hkrum masha law jat ai majaw July (10)jan ya kaw nna Muklum kata numdaw lahkawng lang ngu na Ji grawng tsi bai gat ai lam  galaw nga ai re.

 

Leave a Reply

Your email address will not be published. Required fields are marked *