Robert Hpyenyen Dabang Kaw Nga Ai Mungshawa Ni Htinggaw Shagu Ngu Na Machyi Makaw Byin Hkrum Nga

Manmaw mare Robert Hpyenyen Dabang kaw nga ai mungshawa ni Lai wa sai July shata kaw nna, htinggaw shagu ngu na daram hta yawm dik marai langai machyi makaw byin hkrum hkra nga ai lam na chye lu ai.

Robert Sasana Wang kata na Jahkrai Boarder ma ni marai (60) daram COVID ana jep mu lu ai hpang, Dabang kata kaw nga ai hpyenyen mungshawa ni hta mung waw waw, hkum kahtet re lam ni dingyang byin wa ai re lam Dabang Komiti tsun ai  kaw na chye lu ai.

Tsi rung tsi jaw gawk ni pat mat ai majaw ana jep na matu  yakhkak mat ai hta n-ga Dabang kata hta garum ntum n lu mat ai shata lahkawng rai sai majaw malu masha  tsi mawan grai ra ahkyak nga ai lam mung tsun ai.

Ya ten Dabang hpe lockdown galaw da ai aten re majaw pru hkawm pru sa nmai nna grau nna yakhkak wa ai. COVID-19 ana lama jep dat yang gaw yawng kaw ana jep mu lu na masa nga ai nga nna mung tsun ai.

Manmaw mare kata COVID-19 ana kap hkrum ai masha ya aten du hkra rai yang marai (601) nga ai kaw na , Mai Tsai nna tsi rung yu ai masha gaw marai (448) nga ai kaw na, Tsi Tsi hkamla nga ding yang re ai masha gaw marai (106) re ai, COVID-19 ana a majaw asak si sum ai masha marai (47) rai sai lam mung chye lu ai.

 

Leave a Reply

Your email address will not be published. Required fields are marked *