Maisak Pa Check Point Shinggan Kaw Na Mungshawa Ni Marai (44) Kaw Ana Jep Mu Lu

Maisak Pa Check Point, shinggan kaw nga ai mungshawa ni hpe, Ginjaw COVID-19 Ana Zinli Makawp Ninghkap Komiti kaw nna, COVID-19 ana jep ya ai lam galaw ai hta masha marai (44) kaw ana jep mu lu ai lam chye lu ai.

Ana sa jep hkamla ai masha marai (886) nga ai.  Ana jep mu lu ai marai (44) yawng Nam San mare kaw na re. Ana jep mu lu ai ni hta Asak (3) ning re ai ma langai lawm ai lam chye lu ai.

Nam San mare laika sharin jawng kaw COVID positive gawn lajang shara shatai nna tsi gawn lajang ai. Nkau hpe gaw Stay At Home hku nna gawn lajang nga ai lam, Mare komiti Slg langai ya na zawn tsun ai.

“Anhte gaw Laika sharin jawng gawknu kaw gawn lajang da ai, Jawng gawknu kaw gaw marai (21) bang da ai, ngam ai hpe gaw nta kaw Stay At Home tawn nna gawn lajang nga ai  ”

Ana jep ya ai majaw mung, COVID-19 ana makawp ninghkap arung arai hte tsi mawan nkau hpe garum jaw ai majaw mung, Ginjaw COVID-19 Ana Zinli Makawp Ninghkap Komiti ni hpe chyeju dum ai lam, Ya ten gaw tsi gawn lajang hkam nga ai ni a matu malu masha yakhkak nga ai lam, Matut nna mung Ginjaw COVID -19 Ana Zinli Makawp Ninghkap komiti hte laata gindun nhtawm COVID-19 tsi jep ai lam, makawp ninghkap ai lam ni  matut galaw sa wa na re lam mung Namsan Yang mare salang ni tsun ai.

 

 

 

 

Leave a Reply

Your email address will not be published.